Qashqadaryo viloyatining G‘uzor tumanida faoliyat yurituvchi metan “zapravka” gazga noqonuniy ulanib, 49 kun ichida davlatga 1 milliarddan ortiq zarar yetkazdi. Bu haqda “Daryo”ga MIB Qashqadaryo viloyat boshqarmasi xabar beryapti.
“O‘ztransgaz” AJ Qashqadaryo viloyati bo‘yicha gaz ta’minoti hududiy filialining mansabdor shaxslari ulgurji iste’molchilarning gaz hisoblagichlar ko‘rsatgichlarini kuzatib, yetarli darajada tahlil qilmagani bois, tabiiy gazning talon-toroj bo‘lishiga yo‘l qo‘yib bergan.
Xususan, “Hududgaz ta’minot” AJ va “O‘zstandart” agentligi Qashqadaryo sinov va sertifikatlashtirish markazi davlat korxonasi mutaxassislari bilan hamkorlikda o‘tkazilgan tekshirishda, G‘uzor tumanidagi “TAZIB” MChJga qarashli avtomobillarga gaz to‘ldirish kompressor shoxobchasi (AGTKCh)da o‘rnatilgan gaz hisoblash uskunasi konfiguratsiyasining bosimlar farqi kalibrovkasiga o‘zgartirish kiritish yo‘li bilan 2019-yil 1-avgustdan 2019-yil 18-sentabrga qadar ya’ni 49 kun davomida tashqi ta’sir o‘tkazilib, 1 milliard 31 million 683 ming so‘mlik 1031683 m3 tabiiy gaz noqonuniy ravishda iste’mol qilinganligi aniqlangan.
Holat yuzasidan dalolatnoma rasmiylashtirib, shoxobcha gaz tarmog‘ida uzib qo‘yilgan edi. Shundan so‘ng MChJ davlatga yetkazilgan zararni hamda tarmoqqa qayta ulash uchun to‘lovlarni amalga oshirdi va joriy yilning 22-yanvar kuni tarmoqqa qayta ulab berildi.
Izoh (0)