22-yanvar kuni Gretsiya parlamenti mamlakat prezidentligiga Katerina Sakellaropulu nomzodini qo‘llab-quvvatlab ovoz berdi, deb xabar berdi “RIA Novosti”.
Bunga qadar Katerina Sakellaropulu oliy ma’muriy sud davlat kengashining raisi edi.
Unga “Yangi demokratiya” hukmron partiyasi, SIRIZA radikal so‘l kuchlar koalitsiyasi partiyasi, va “O‘zgarishlar harakati” so‘l partiyasi deputatlari ovoz bergan. 63 yoshli sudyaning nomzodini Gretsiya bosh vaziri Kiriakos Mitsotakis ilgari surgan edi. Katerina Sakellaropulu mamlakat tarixida ilk marta davlat oliy lavozimini egallagan ayol bo‘ldi.
Konstitutsiyasiga ko‘ra, Gretsiya parlamentar respublika hisoblanadi. Davlat rahbari prezident bo‘lib, u, asosan, marosimlarga oid vazifani bajaradi, asosiy hokimiyat bosh vazirga tegishli.
Yekaterina Sakellaropuluning qasamyod qabul qilish marosimi 14-mart kuni parlament yalpi majlisida o‘tkaziladi.
Mamlakatning hozirgi prezidenti Prokis Pavlopulos 2015-yilning martida besh yil muddatga saylangan edi. Uning vakolati 13-mart kuni tugaydi.
Izoh (0)