“Xalq banki” Surxondaryo viloyati filiali Termiz amaliyot bo‘limi yopildi. Mazkur bo‘limda ishlab kelayotgan 45 nafar xodim ishsiz qolmoqda. Bu haqda “Daryo”ga shikoyat qilgan murojaatchilar muammosini o‘rgangan jurnalist Nargiza Rahmatullayevaning yozishicha, amaliyot bo‘limining yopilishiga AT “Xalq banki” boshqaruvining 2019-yil 24-iyuldagi qarori asos qilib olingan.
— Yigirma yildan buyon shu bankda ishlab kelayotgandim. Shu vaqtga qadar Termiz amaliyot bo‘limi daromad bilan chiqqan. Faoliyatimiz davrida yaxshi ishlaganmiz, — deydi Gulchehra Usanova. — 4 nafar voyaga yetmagan farzandim bor. Ayni paytda uy-joyim yo‘q. Ijarada turamiz. Yaqinda bankdan uy-joy olish maqsadida kredit olgandim. Turmush o‘rtog‘imning tayinli ishi yo‘q, oilada faqat o‘zim ishlayman. Endi farzandlarni qanday boqamiz?
Murojaatchilarning aytishicha, Termiz amaliyot bo‘limi yopilib, yangi amaliyot bo‘limi tashkil etilgan. Ammo eski xodimlar bo‘shatilib, boshqa xodimlar ishga olingan.
— Yangi amaliyot bo‘limi tashkil qilib bo‘lingan, — deydi murojaatchi Dildora Ismoilova. — Faqat bizning “MFO”imiz bilan ishlolmaganligi sababli Toshkent viloyat “MFO”si bilan ishlab turgandi. Aslida bank qonunchiligida bu mumkin emas. Shuning uchun bizning amaliyot bo‘limimizni yopib, “MFO”imizni o‘sha Toshkent “MFO”si bilan ishlayotgan yangi amaliyot bo‘limiga berishdi.
Dildora Ismoilovaning aytishicha, 2019-yil AT “Xalq banki” Surxondaryo viloyati filiali uchun 3 qavatli zamonaviy, mijozlarga har tomonlama qulay bo‘lgan bino qurilib, foydalanishga topshirilgan. Uning birinchi qavatida yangi tashkil etilgan Termiz amaliyot bo‘limi ish boshlagan.
— Yangi tashkil etilgan amaliyot bo‘limiga bizni emas, boshqa xodimlarni ishga olishdi, — deydi Dildora Ismoilova. — 6 nafar farzandim bor. Katta farzandim shartnoma asosida o‘qiydi. Endi farzandlarimning keyingi taqdiri nima bo‘ladi? Nega ko‘p yillik ish tajribasiga ega bo‘lsak-da, bizga ish bermay, bizning o‘rnimizga yangi xodimlarni olishdi? Bizning aybimiz nima?
— Bizga nisbatan nohaqlik bo‘lyapti, — deydi Gavhar Mamatqulova. — Nega ko‘p yillik ish tajribasiga ega xodimlar turib yangi xodimlar ishga olinmoqda? Bizga ularning qanday xusumati bor? Ayni paytda e’lon berilib yangi xodimlarni ishga olishmoqda. Nega bizni emas? Biz endi Rossiyaga ishga ketamizmi?
Murojaatchilarning aytishicha tugatilayotgan amaliyot bo‘limi daromad bilan ishlab kelgan.
— 200 million so‘m daromaddamiz, — deydi ishdan bo‘shatilayotgan xodimlar. — Nima uchun daromadda turgan filial yopilmoqda? “Xalq banki” viloyat boshqaruvi raisi A.Xolmonovning aytishicha, “Termiz shahrida 2 ta filial ishlatish mumkin emas ekan.
Ta’kidlash joizki, Aksiyadorlik tijorat “Xalq banki” Surxondaryo viloyati filiali Termiz amaliyot bo‘limi tugatilganligi sababli bank xodimlariga mehnat shartnomasi ish beruvchining tashabbusi bilan bekor qilinayotgani to‘g‘risida ogohlantirish xati berilgan.Unda mehnat shartnomasi 2020-yil 17-yanvar kunidan boshlab ikki oy muddat o‘tganidan so‘ng bekor qilinishi, kelgusida xodimni ish bilan ta’minlash imkoniyati yo‘qligi ma’lum qilingan.
Jurnalist Nargiza Rahmatullayeva bilan telefon orqali muloqot qilgan “Xalq banki” viloyat boshqaruvi raisi Anvar Xolmonov mazkur holatni tegishli tartibda ko‘rib chiqamiz deyish bilan cheklandi. Qay tartibda ko‘rib chiqiladi? Bo‘shatilayotgan xodimlar taqdiri ne kechadi? Bu haqda ma’lumot bermadi.
Izoh (0)