Favqulodda vaziyatlar vazirligi “Toshkent—O‘sh” avtomobil yo‘lining Qamchiq dovoni qismida aholini va avtotransport vositalarining xavf-xatarsiz harakatlanishini ta’minlash yuzasidan monitoring o‘tkazish, yo‘llardagi muzlamalarga qarshi qordan tozalash ishlarini olib borish va xavfli uchastkalarda qor ko‘chkisi, yer ko‘chkisi, tosh tushishi xavfi yuqori hududlarda harakat xavfsizligiga qaratilgan ogohlantirish belgilari o‘rnatish kabi tadbirlar amalga oshirlayotganini xabar qildi.
Shuningdek, vazirlik axborot xizmati haydovchilarning qor ko‘chkisi xavfi bor hududlarga o‘rnatilgan ogohlantirish va taqiqlovchi yo‘l belgilariga qaramasdan avtotransport vositalarini to‘xtatayotgani va xavfli uchastkalarda odamlarning sayr qilayotgani, bolalarning qor o‘ynayotgani ular hayotiga xavf solayotganini qayd etgan.
Vazirlik avtomobil yo‘lining 224—252-kilometrlari qor ko‘chkisi xavfi yuqori hududlar ekanini ma’lum qilgan.
Ob-havoning keskin o‘zgaruvchanligi, tog‘ qiyaliklarida qor massasining ortib ketishi, hududning yuqori nishabliligi hamda avtomobil yo‘lida harakat yuklamasining ko‘pligi sababli mutaxassislar avtotransport haydovchilari va yo‘lovchilarga:
yo‘l harakati qoidalari va belgilariga rioya qilgan holda harakat xavfsizligi qoidlalariga amal qilishni;
avtomobil yo‘lining xavfli uchastkalarida tog‘ qiyaliklariga chiqmaslik, qor o‘ynamaslik hamda avtotransport vositasini ushbu joylarda to‘xtatmaslikni tavsiya etgan.
Izoh (0)