“O‘zbekkino” ijtimoiy tarmoqlar foydalanuvchilaridan filmlarni noto‘g‘ri talqin qilmaslikni so‘ramoqda

Ijtimoiy tarmoqlar foydalanuvchilari tomonidan diniy-ekstremizm qoralangan, tinchlikka tahdid soluvchi kuchlarning ma’naviy qiyofasi aks ettirilgan filmlarning maqsad-mazmuni, g‘oyasini noto‘g‘ri talqin etish holatlari uchramoqda, deb yozadi O‘zA.

“O‘zbekkino“ Milliy agentligi tomonidan ishlab chiqarilayotgan filmlar ssenariy bosqichidayoq Badiiy kengash a’zolari tomonidan muhokama qilinib, filmda ma’naviyatga mos kelmaydigan, diniy-ekstremizmni targ‘ib etuvchi, hududiy ayirmachilikka undovchi, konstitutsion tuzumga qarshi sahnalar bo‘lishiga yo‘l qo‘yilmaydi. Film loyihasi Badiiy kengash nizomiga mos kelmasa va yuqoridagi holatlar kuzatilsa, ssenariy o‘tkazilmaydi.

Shuni aytish lozimki, “O‘zbekkino“ Milliy agentligi tomonidan ishlab chiqarilayotgan milliy filmlarda biror millatni, dinni va tilni kamsitishga yo‘l qo‘yilmaydi. Badiiy kengash filmning badiiy va g‘oyaviy darajasi bilan birga kinoasarning konstitutsion normalarga mos kelish-kelmasligini ham nazorat qiladi, deyiladi xabarda.