13-yanvar kuni o‘tkazilgan Yoshlar press klubi sessiyasida Xalq ta’limi vaziri Sherzod Shermatov hamon maktablarda kuzatilayotgan holat – “yig‘di-yig‘di” masalasi borasida shaxsiy fikr-mulohazalarini bildirib o‘tdi. Bu haqda “Daryo” muxbiri Mirolim Isajonov xabar berdi.
‘Yig‘di-yig‘di’larning sabablari ko‘p. Masalan, bir, ikkita bahona bo‘lishi kerak. Birinchi bahona aksariyat maktablarning moddiy-texnik bazasi yaxshi emasligida. Keyin tekshiruvchi kam bo‘lishi zarur. Biz bu tizimga ishga kelganimizga qadar 120 mingdan ortiq tekshiruv o‘tkazilgani oydinlashdi. Har bir tekshiruv ham ‘yig‘di-yig‘di’ning bir sababida. Tekshiruvchiga choy beradi, boshqa qiladi. Shuning uchun bilim dargohlarining moddiy-texnik bazasini yaxshilash, tekshiruvni kamaytirish va o‘qituvchining oyligini oshirish bo‘yicha yaxshi ishlash kerak.Haqiqiy gap, o‘qituvchining oyligi, ayniqsa, Toshkent shahrida juda past. Biz mahalliy budjet hisobidan Toshkent shahri o‘qituvchilari oyligini oshiraylik, desak buni darrov hurmatli OAV vakillari muhokama qilishdi. Butun dunyoda bor tajriba bu: poytaxtda narx-navo qimmatroqligi uchun oylik miqdori yuqori bo‘ladi.
Yana bir narsani inobatga olish lozim: o‘qituvchi ham majburan shuni qilgin, demaydi. Ota-onalarning o‘zlari kelishib, o‘rtada pul yig‘ishadi. Qo‘shtirnoq ichidagi tashabbuskor ota-onalarimiz ham juda ko‘p. Hamma o‘zaro kelishib, ortiqcha qiyinchilik tug‘dirmay, sharoit yaratib yordamlashsa yaxshi bo‘lardi. Agar kimdir ‘yig‘di-yig‘di’larga majburlanayotgan bo‘lsa, huquqni muhofaza qiluvchi organlarga murojaat etsin. Menimcha, hozir hech kim majburlanadigan darajada emas. Savob uchun ham maktablarga foyda keltirayotganlar bor. O‘tgan yili 12 tadan ziyod maktablarimiz homiylar tomonidan qurilib, ta’mirlandi. Bu men eshitganlarim, sanasak bundan-da ko‘p.
Sherzod Shermatov, Xalq ta’limi vaziri
Izoh (0)