O‘zbekiston Prezidenti Shavkat Mirziyoyev bugun, 11-yanvar kuni Alisher Navoiy nomidagi O‘zbekiston Milliy bog‘ida amalga oshirilayotgan ishlar bilan tanishdi va shu yerning o‘zida Toshkent shahri tumanlari hokimlari bilan muloqot qildi, deb xabar bermoqda “Kun.uz”.

Muloqot davomida Toshkent shahar hokimi Jahongir Ortiqxo‘jayev tomonidan prezidentga Toshkent shahrida rejalashtirilayotgan qurilish ishlari haqida ma’lumot berildi.

Jumladan, shahar hokimi so‘zlariga ko‘ra, 2020-yil davomida poytaxtda jami 302 ta ko‘p qavatli uy, 17262 ta xonadon qurilishi rejalashtirilmoqda. Qurilishlarning umumiy maydoni esa 1 201,30 kvadrat metrni tashkil qiladi.

Shundan so‘ng Shavkat Mirziyoyev Toshkent shahridagi qurilish ishlarida e’tibor qaratilishi kerak bo‘lgan muhim jihatlarga to‘xtalib o‘tdi.

Biz Toshkent shahrini aholi yashashiga har tomonlama qulay shaharga aylantirish uchun turli loyihalar, yangi qurilishlar qilyapmiz. Albatta, joylarda amalga oshirilayotgan bunyodkorlik ishlari davomida ayrim binolarning buzilishi tabiiy hol. Ammo har qanday qurilish ham, buzilishlar ham eng avvalo xalqning roziligi bilan bo‘lishi kerak.

Hokimliklar buziladigan binolarning kompensatsiya to‘lovini to‘lab, aholi rozi bo‘lgachgina yangi qurilishni boshlashi kerak. Hozir hammasi oson. Ommaviy axborot vositalari rivojlanib bormoqda. Ular har bir harakatimizni kuzatib, yoritib borishmoqda.

Menga uy-joyni noqonuniy buzish orqali aholini norozi qilish, shuningdek, noqonuniy buzilishlar tufayli O‘zbekiston imiji dunyoga noto‘g‘ri jihatdan ko‘rinishi kerak emas.

Shavkat Mirziyoyev, O‘zbekiston Prezidenti

Avvalroq, Shavkat Mirziyoyev Toshkent shahridagi Prezident Xalq qabulxonasida, shunigdek Alisher Navoiy nomidagi O‘zbekiston Milliy bog‘ning ko‘ngilochar qismida amalga oshirilayotgan qurilish ishlari bilan tanishdi. Avvalroq Prezident bog‘dagi Adiblar xiyoboni va bo‘lajak Toshkent muzeyida qilinayotgan ishlarni borib ko‘rgani haqida xabar berilgan edi.