Eron rasmiylari Tehron yaqinida qulagan “Ukraina xalqaro avialiniyalari”ga tegishli Boeing 737 samolyotining qora qutilarini Fransiyaga topshirish niyatida. Bu haqda Eron fuqaro aviatsiyasi tashkilotining surishtiruvlar bo‘limi boshlig‘i o‘rinbosari Hasan Rizoifar ma’lum qildi, deya xabar bermoqda IRNA.
Rizoifarning so‘zlariga ko‘ra, Eron qora qutilarni o‘z hududida tadqiq etmoqchi edi, ammo ularni rasshifrovka qilish imkoni yo‘qligi bois, bort yozuvchilarini Fransiyaga topshirishga qaror qilgan.
Eron dastlab Kanada, Fransiya va AQShdan qora qutilarni rasshifrovka qilish imkonini beruvchi qurilmalarni taqdim etishni so‘ragan edi, biroq uchala mamlakat ham bu iltimosni rad etdi. Oxir-oqibat Eron Ukraina, Shvetsiya, Buyuk Britaniya, Kanada va AQShga mustaqil laboratoriya tanlashni taklif qildi va ular qora qutilarni Fransiyaga yuborishni ma’qul topdi.
Avvalroq Eronning IRINN yangiliklar kanali samolyot qora qutilari aks etgan videoyozuvlarni e’lon qilgan edi.
9-yanvar kuni Bellingcat asoschisi Eliot Xiggins, guvohlarning so‘zlariga asoslanib, fojia joyidan samolyot bo‘laklari buldozerlar yordamida olib tashlanganini ma’lum qilgan edi. Uning so‘zlariga ko‘ra, bu haqiqiy tergov olib borish imkonini yo‘qqa chiqaradi. CBS jurnalisti Elizabet Palmer ham mahalliy aholiga tayanib, bu ma’lumotni tasdiqladi. Uning qayd etishicha, hodisa joyida o‘rab olinmagan va qo‘riqlanmayapti.
https://twitter.com/elizapalmer/status/1215525563961630720
Eron Ukraina samolyotini tasodifan, inson xatosi tufayli havo hujumidan mudofaa tizimi raketasi bilan urib tushirganini 11-yanvar kuni tan oldi. Eron Qurolli kuchlari Bosh shtabidan ma’lum qilishlaricha, yo‘lovchi samolyoti dushman uchog‘i sifatida qabul qilingan va unga qarata raketa uchirilgan.
Izoh (0)