So‘nggi vaqtlarda internet saytlari, ijtimoiy tarmoq sahifalarida Haj va Umra safarlariga oid “Noinsoflar kasofati”, “Hajga qachon borishingizni bilasizmi yoxud yana monopoliya haqida...”, “Rixos tour” rahbari Haj va Umra monopoliyasi haqida...” sarlavhali maqola va materiallar e’lon qilindi.
Shuningdek, turli aylanma yo‘llar orqali Umra safariga ketib, u yerda qarovsiz qolgan, sargardon bo‘lib mashaqqat va iztirob chekayotgan fuqarolarimizning ayanchli holatlari aks etgan videolavhalar ham tarqaldi. Mazkur videolavhalarning izohida ijtimoiy tarmoq foydalanuvchilari tomonidan turli fikrlar bildirildi. Aksariyat foydalanuvchilar hukumat ko‘magida tashkil etilayotgan Umra tadbiri orqali borilganda, bu kabi sarson-sargardonlik holati yuza kelmasligini ta’kidlagan.
Vazirlar Mahkamasi huzuridagi Din ishlari bo‘yicha qo‘mita ijtimoiy tarmoqlarda e’lon qilingan ushbu maqolalar va ularning izohida qoldirilgan sharhlarga munosabat bildirdi.
“Ziyoratchilarimiz uchun Makka va Madina shaharlarda yaratilgan shart-sharoitlar va boshqa qulayliklar haqida ko‘p gapirildi. Bu haqida yana to‘xtalmoqchi emasmiz, qiziqqan insonlar, xususan, maqola mualliflari O‘zbekiston Haj va Umra tadbirlarini tashkil etish va o‘tkazish masalalari bo‘yicha jamoatchilik kengashining rasmiy Telegram kanaliga kirib (@hajumrauz) batafsil ma’lumot olishlari mumkin. Shundagina har xil gap-so‘z qilmasdan, asl holatni o‘z ko‘zlari bilan ko‘rib, da’volari asossiz ekanini anglaydilar, degan umiddamiz”, — deyiladi munosabatda.
Ta’kildanishicha, qoldirilgan ayrim sharhlarda hozirda umraga borayotgan ziyoratchilarimiz “Masjidul haramdan” 4—5 km uzoqlikda yashayotgani aytilgan, bunga javoban, Din ishlari bo‘yicha qo‘mita ziyoratchilar Madina shahrida “Masjidun Nabaviy”ning shundoqqina yonida, atigi 50 metr uzoqlikda joylashgan 5 yulduzli “Pulman Zam-zam”, Makka shahrida “Masjidul haram”dan 4—5 kilometr uzoqda emas, aksincha 600—650 metr masofada joylashgan 4 yulduzli “Abroj al-Kisva” mehmonxonasida istiqomat qilayotganini aytib o‘tgan.
“Hurmatli maqola mualliflari! Umra bu sayohat emas, ibodat ekanini unutmang! Bu diniy ibodatda asosiy masala odamlarni jo‘natib, pulini sanab olish emas, ularning xavfsizligi va din amallarining mukammalligidir.
Shu maqsadda hukumat ko‘magida tashkil etilayotgan safarda ziyoratchilarimizning Umra amallari bekam-u ko‘st, barcha arkonlari bilan to‘liq bajarilishi uchun bilimli, malakali, tajribali diniy soha xodimlaridan iborat guruh rahbarlari (ellikboshilar) biriktiriladi”, — deyiladi munosabatda.
Avvalroq Andijondagi turfirma tomonidan Umra ziyoratiga jo‘natilgan 14 nafar o‘zbekistonlikning vizasi soxta bo‘lib chiqqani, Saudiya Arabistoni hukumati tomonidan ularning vizasi bekor qilinib, mamlakatdan deportatsiya qilingani haqida xabar berilgan edi. Qo‘mita bayonotida aytilishicha, bu kabi holatlar tez-tez uchramoqda, Saudiyada og‘ir ahvolda, mashaqqat chekib, ko‘z yosh to‘kkan yurtdoshlarimizning hasratlari aks etgan foto va videolavhalar ham taqdim etilmoqda.
“Mo‘may daromad topish ilinjida fuqarolarimizni sarson qilayotgan, mukammal Umra ibodatini emas, faqatgina nafsini o‘ylayotganlar hech narsadan tap tortmayotgani, Umra safarini hukumat yordamida rasmiy, xavfsiz va ishonchli tashkil etayotgan O‘zbekiston musulmonlari idorasi va Din ishlari bo‘yicha qo‘mitani “monopol” deb ayblayotganlar odamlarni chalg‘itib, aldovlar bilan ularning ishonchiga kirib, chuv tushirayotgani achinarli hol, albatta!
Aslida, minglab fuqarolarimiz hukumat yordamida tashkil etilayotgan Umra safariga qiyinchiliksiz, xavfsiz borib kelishmoqda. Bu haqiqatni butun xalqimiz biladi, e’tirof etadi va tashkilotchilarga rahmatlar aytishmoqda, bu hech kimga sir emas”, — deb ta’kidlangan qo‘mita munosabatida.
Shuningdek, maqolalardan biridagi “Avval ‘Umra’, endi ‘Umra+’ ham monopol bo‘ladimi?” degan savolga ham to‘xtalib o‘tilgan.
Qayd etilishicha, Din ishlari bo‘yicha qo‘mita yoki O‘zbekiston musulmonlari idorasi “Umra+” dasturini amalga oshirishga ko‘maklashadi. Bu faoliyat bilan bevosita tadbirkorlik subyektlari, jumladan, turfirmalar va kompaniyalar shug‘ullanadi.
Din ishlari bo‘yicha qo‘mita va O‘zbekiston musulmonlari idorasi — xorijiy davlat delegatsiyalari, xorijiy va mahalliy OAVlari, nufuzli din arboblari, jumladan, sayohat agentliklarining murojaatlari asosida O‘zbekistondagi ziyorat marshrutlarida joylashgan obyektlarga xorijiy sayyohlarning ziyoratlarini namunali tashkil etishda yaqindan yordam beradi. Hozirga qadar o‘nlab o‘zbekistonlik turoperatorlarning shu kabi murojaatlari asosida O‘zbekistonga ziyoratlar namunali tashkil etilmoqda.
Shuningdek, ta’kidlanishicha, “Vest Travel” sayyohlik firmasi ham O‘zbekistonga sayyohlarni olib kelish yoki “Umra+” dasturida erkin ravishda aviachiptalarni sotib olishi O‘zbekistonda barcha sayyohlik tadbirlarini tashkil etishi mumkin, bu borada qo‘mita yaqindan yordam beradi. Istagan sayohat agentligi ushbu yo‘nalishda “Umra+” ziyoratchilari uchun aviachiptalarni Uzbekistan airways AJga murojaat qilgan holda erkin xarid qilishi mumkinligini ham eslatib o‘tgan. Bu borada Din ishlari bo‘yicha qo‘mita vakolat doirasida doimo hamkorlikka tayyor ekanligini bildirgan.
Izoh (0)