Islom Karimov vafotidan so‘ng O‘zbekiston Prezidenti vazifasini bajaruvchi etib tayinlangan bosh vazir Shavkat Mirziyoyev xalqning muammolarini o‘rganish, ularni hal etish uchun Bosh vazir portalini ishga tushirgandi. Shavkat Mirziyoyev Prezidentlik saylovlarida g‘alaba qozonganidan so‘ng Bosh vazir portali Prezident portaliga aylantirildi.
Portal ishga tushgan paytda ko‘plab muammolar, oylab, kerak bo‘lsa yillab cho‘zilgan masalalar bir necha kun ichida hal bo‘lishni boshladi. Odamlar portalga yozish bilan tahdid qilib, ishini bitira boshladi. Ba’zilar portalni barcha tilaklarni amalga oshiruvchi “oltin baliqcha” deb o‘ylagan shekilli, unga turli g‘alati murojaatlar kelib tusha boshladi.
Joriy hafta buxorolik bir yigitning UFC’da yengil vazndagi chempion Habib Nurmagomedov bilan jang tashkil qilib berishlarini so‘rab, Prezident portaliga yo‘llagan murojaati surati ijtimoiy tarmoqlarda tarqaldi.
“Men Habib Nurmagomedov bilan jang qilmoqchiman. Bu masalada hech qayerga murojaat qilmadim. Iltimos, menga shu imkoniyatni yaratib berishlarini so‘rayman. Habib kamarini halollab olsin. Meni ham, Habibni ham tibbiy ko‘rikdan o‘tkazishlarini so‘rayman”, — deyiladi o‘sha murojaatda.
“Daryo” uch yildan ortiq vaqt davomida portalga yuborilgan eng ajabtovur murojaatlarni bir joyga jamladi.
“Men ham boy bo‘lay”
Toshkentlik fuqaro birovning biznesini olib qo‘yishda yordam berishni so‘rab, portalga murojaat yo‘llagandi. U boy bo‘lgisi kelayotganini aytib, Toshkent shahridagi moy almashtirish shoxobchasini yurgizgisi kelayotganini yozgan.“Yo‘q demasangiz, men moy almashtirish shoxobchalarini yurgazmoqchiman. Shunga Archa-ko‘chada Castrol degan shoxobchani menga olib bersangiz. Egasi necha yildan beri foydalanadi axir. Men ham boy bo‘layin degandim”.
“Ismimni Haqiqat Haqiqatovga o‘zgartirib bering”
Xorazmlik fuqaro portalga murojaat yo‘llab, Shavkat Mirziyoyevdan uni o‘z yoniga ishga olishini iltimos qilgan. U 100 nafar huquq-tartibot xodimining ishini bajarishini aytib, ismini Haqiqat Haqiqatovga o‘zgartirib berishlarini so‘ragan.“Meni Shavkat Mirziyoyev janoblari yoniga ishga olishlarini iltimos qilaman. Chunki Hazorasp tumanida haqiqat o‘lgan, adolat yo‘q. Hozir amaldagi huquq-tartibot organlarining 100 tasini ishini bajaraman. Men charchamayman, faqat meni xavfsizligimni ta’minlasalar bo‘ldi. Meni ismi-sharifimni Haqiqat Haqiqatovich Haqiqatov deb o‘zgartirib berishsin. Ushbu masala bo‘yicha amaliy yordam berishingizni so‘rayman”.
“Menga, menga, er kerak menga”
Qashqadaryolik qiz go‘zal, qaddi-qomati kelishgani, ammo o‘ziga mos turmush o‘rtoq topolmayotganini aytib, Shavkat Mirziyoyevning shogirdlaridan biriga erga tegmoqchi ekanligini yozgan.
“Yoshim 28 da. Chevarman, har xil urfdagi zamon talablariga mos milliy va zamonaviy liboslar tikib yarataman, yaxshigina pazanda hamman. O‘zimga yarasha iffatim, go‘zalligim ham bor, qaddi-qomatim ham kelishgan. Tabiatan mehribon jiddiy qizman. Hayotga real qarayman. Lekin bir muammo — baxtim borasida o‘zimga mos, ko‘nglimdagidek bo‘lajak turmush o‘rtoq uchratmayapman. Sizga iltimosim shuki, kelishgan, chiroyli, o‘qimishli, bo‘lajak oilasiga mehribon, sog‘lom, hayotga tayyor, moliyaviy tomonlama ham hamma narsasi bor munosib shogirdlaringiz bo‘lsa, iltimos, turmush qurishimizga, mustahkam oila qurishimizga o‘zingiz bosh bo‘ling”.
Ollohning elchisi
Yana bir fuqaro o‘zini Ollohning elchisi ekanligini da’vo qilib, buni isbotlab ham bera olishini yozgan.
“Men Ollohning elchisiman. Menga ayolimning qarindoshlari tuhmat qilishdi. Bu haqda viloyat prokuraturasida bir necha marotaba murojaat qildim. Ular menga hech qanday jinoyat yo‘q deb aytishdi. Meni qo‘rqitib otib ham ko‘rishdi. Rossiyada sudga ham berishdi. 7 yildan beri shunaqa. Men Ollohning elchisi ekanligimni isbotlab bera olaman.Men 3–4 marta viloyatdagi xalq qabulxonasiga bordim. Ular qog‘oz berib, shu qog‘ozga yozib bering, keyin jo‘natamiz deb aytishdi. Keyin xalq qabulxonasidagilar yo‘q biz jo‘nata olmaymiz deb aytishdi. Avvalambor *****dagilar ishonishadi. Lekin o‘zini yo‘liga yurgizishmoqchi. Prokuraturaga ham isbotlab berishimni aytdim.
Toshkentga borsam menga ish berishmadi. 700 merosni yoddan xalqqa oshkor qilayin. Shunga yordam bersangiz. Menga qabristonga olib borib savol berishdi. Iltimos, shu masalani ko‘rib chiqsangiz”.
“Uy berdingiz. Mashina ham xohlayman”
Surxondaryodan murojaat yo‘llagan fuqarolardan biri 2-guruh nogironi ekani, unga Prezident nomidan uy berilganidan minnatdorligi, endi davlat tomonidan mashina ajratilishini xohlayotganini yozgan.
“Men mashina haydashga qiziqaman. Ammo mashina olish uchun menda sharoit yo‘q. Menga davlat hisobidan mashina berilishini istayman. Bu masalada Denov tumani hokimligiga murojaat qildim, ammo mashina ajratilmasligini aytishdi. Mening Sizdan iltimosim, ushbu masala yuzasidan amaliy yordam berishingizni so‘rayman”.
“Pul to‘lamaganim uchun pasportimni olib qo‘yishdi”
Yashash manzili bo‘lmagani andijonlik fuqaro 5 kun mehmonxonada pul to‘lamay yashagani uchun pasportini olib qo‘yishganidan shikoyat qilgan.
“Men yashash manzilim yo‘q bo‘lgani sababli Andijon shahar Elita mehmonxonasida 5 kun muddat yashagan edim. Yashaganim uchun pul to‘lay olmaganim sababli fuqarolik pasportimni olib qolishgan edi. Pulni to‘lashga imkonim yo‘q. Shu masala bo‘yicha Andijon shahar hokimiyatiga murojaat qildim, natija bo‘lmadi”.
2 million so‘m uchun zaxiradagi killer
Ichki ishlar organlari xodimi bo‘lish istagidagi namanganlik fuqaro IIV rahbari Po‘lat Bobojonovdan 2 oy 1 million so‘mdan pul berib turishini so‘ragan. Fuqaro pullarni albatta qaytarishini aytib, zaxiradagi killer bo‘lishi mumkinligini yozgan.
“IIBga ishga kirish uchun yordam so‘ragan edim. Uyimga .... viloyati IIB xodimlari kelib men IIBga ishga kira olmasligimni, sababi ma’lumotim yo‘q ekanligini yaxshi gapirib tushuntirishdi. Hurmatli Bobojonov Po‘lat Razzoqovich menga 2 oy 1 million so‘mdan yordam berishlarini iltimos qilaman. Men bu pulni albatta qaytaraman. Agar xohlasangiz, zaxiradagi killer bo‘lishim mumkin. Sizdan iltimos, ushbu murojaatimni ijobiy hal qilib bersangiz”.
“Kursdoshim telefonini ko‘tarmadi”
Moliya institutini bitirgan farg‘onalik yigit vinyetkasi kursdoshida qolib ketgani, ammo kursdoshi bilan bog‘lana olmayotgani uchun Prezidentga murojaat qilgan.
“2010-yilda Toshkent davlat moliya institutini “Kredit iqtisodi” fakultetini bitirganman. Bitirgan vaqtimda vinyetkam qolib ketgan. G‘azalkent milliy bankida kursdoshim, Qodirov Farrux ishlaydi. Qo‘ng‘iroq qilsam, ko‘tarmadi. Vinyetkamni qaytarib olishim uchun yordam berishingizni so‘rayman”.
“Qiynalib yetishtirgan nashalarimni prokuratura va IIB xodimlari uzib olib ketishdi”
Bekobod shahridan murojaat yo‘llagan fuqaro ilgari geroin iste’mol qilgani uchun ikki marta qamalib chiqqani, hozirda geroinni tashlab, nasha iste’mol qilishga o‘tganini yozgan. Hech qayerdan nasha topolmagani uchun o‘z uyida nasha yetishtirishni boshlaganida huquq-tartibot organlari xodimlari nashalarni uzib olib ketganidan shikoyat qilgan va bunga tushuntirish so‘ragan.
“Men avval geroin iste’mol qilganligim sababli 2 marta qamalib chiqqanman. Men hozirda geroin iste’mol qilishni tashlab, nasha iste’mol qilishga o‘tganman. Lekin hech qayerda nasha topa olmaganim uchun uyimda o‘zim uchun nasha o‘stirayotgan edim. Uyimdan prokuratura va IIB xodimlari kelib qiynalib yetishtirgan nashalarimning hammasini uzib olib ketishdi. Meni shunchalik uylarimni tekshirishga nima haqlari bor? Men oldi-sotdi qilayotganim yo‘q-ku. Iltimos, uyimda o‘zim foydalanishim uchun o‘stirayotgan nasha o‘simligini nima sababdan uzib olib ketayotganlarini tushuntirib berishlarini va meni tinchligimni ta’minlab berishlarini so‘rayman”.
Izoh (0)