Yanvar oyi boshida ijtimoiy tarmoqlarda shaxsiy foydalanish uchun tovarlarni import qilishning yangi tartibi joriy etilgandan so‘ng bojxona bojlari miqdori ortgani va chegaralarda tirbandlik va navbatlar paydo bo‘lgani haqida xabarlar paydo boldi. Davlat bojxona qo‘mitasi matbuot xizmati ushbu xabarlarga munosabat bildirdi.
Shunday xabarlardan birida o‘zini buxorolik haydovchilar deb tanishtirgan bir guruh shaxslar videomurojaat yo‘llab, yangi tartibni bekor qilishni so‘raydi.
Ularning so‘zlariga ko‘ra haydovchilar o‘zlari uchun emas, vatandoshlarining tovarlarini olib ketayotgan bo‘lgan.
“Bitta Buxoroning o‘zidan 500 nafar haydovchi bir yilda 7 milliard so‘mgacha pul to‘laydi. Hech qaysi investor buncha xarajat qilmaydi”, — deyiladi videomurojaatda.
Biroq videomurojaatda qanday to‘lovlar haqida gap ketayotganiga aniqlik kiritilmagan.
Shu bilan birga ijtimoiy tarmoqlarda va bir nechta yangiliklar saytlarida agar ilgari bir mashina yuk uchun boj miqdori 400 dollar bo‘lgan bo‘lsa, endi bu miqdor 20 marta ko‘proq 8000 dollarni tashkil qilayotgani haqida xabarlar tarqaldi.
Bojxona qo‘mitasi xabarida aytilishicha, O‘zbekiston Prezidentining 2019-yil 7-noyabrdagi “Jismoniy shaxslar tomonidan shaxsiy ehtiyojlari uchun tovarlarni olib o‘tish tartibini yanada takomillashtirish to‘g‘risida” PQ-4508-son qaroriga muvofiq 2020-yil 1-yanvardan boshlab, respublikaga kirib kelayotgan jismoniy shaxslarning notijorat maqsadlardagi tovarlari bojsiz olib kirishning cheklangan me’yorlaridan ortgan holatlarda bojxona to‘lovlari soddalashtirilgan tartibda undirilishi yo‘lga qo‘yildi.
Hozirgi me’yorlar quyidagicha:
- 1000 AQSh dollari — xalqaro kuryerlik jo‘natmalariga kiradigan tovarlar uchun chorak mobaynida;
- 100 AQSh dollari — xalqaro pochta jo‘natmalariga kiradigan mahsulotlar uchun.
Qayd etilishicha, tijorat maqsadi uchun olib kirilayotgan tovarlarni “o‘z ehtiyojim uchun” degan vaj bilan olib kirish holatlari ko‘paymoqda.
Shunday ekan, tovarlar sifat va xavfsizlik bo‘yicha majburiy tekshiruvlardan o‘tkazilishi lozim, deyiladi xabarda.
Bundan tashqari, yagona bojxona to‘lovining joriy etilishi natijasida mazkur tartiblar nafaqat soddalashdi, balki sarflanadigan vaqt bir necha barobarga qisqarib, hozirda o‘rtacha 5-10 daqiqani tashkil qilmoqda.
Ta’kidlash joizki, yagona bojxona to‘lovini undirish amaliyoti Rossiya, Belarus, Qozog‘iston, Qirg‘iziston, Armaniston kabi davlatlarda keng qo‘llanilmoqda. Jumladan, jismoniy shaxslar tomonidan olib kelinayotgan tovarlar uchun 30%, lekin bir kilogramm uchun 4 AQSh dollaridan kam bo‘lmagan miqdorida yagona bojxona to‘lovi joriy etilgan.
Qo‘mita fuqarolarga murojaat uchun “11-08” qisqa raqamli ishonch telefoni ishlayotganni ham eslatib o‘tdi.
Izoh (0)