“Daryo.uz” saytida 2019-yil noyabr oyida “To‘rtinchi qavatdan tushib ketgan 4 yoshli Alibek zudlik bilan operatsiya qilinishi zarur” sarlavhali maqola e’lon qilingan edi.
Maqolada 2017-yilning yoz oyida to‘rtinchi qavatdan yiqilib tushib, qattiq jarohat olgan, tomog‘iga qo‘yilgan plasmassa naycha orqali nafas olayotgan to‘rt yoshli Alibek zudlik bilan operatsiya qilinishi kerakligi, operatsiyaga 2500 dollar miqdorida zarur mablag‘ talab etilishi , biroq oilaning moddiy ahvoli og‘irligi haqida so‘z yuritilgan edi.
“Daryo.uz” saytida e’lon qilinganidan so‘ng, saxovatli insonlar tomonidan yetarli mablag‘ yig‘ildi.
Alibek zudlik bilan shifoxonaga yotqizildi. U yerda Rossiyaning eng kuchli jarrohlari tomonidan 3 soatlik jarrohlik amaliyotini boshidan o‘tkazdi. Yaqinlarining aytishicha, jarrohlik amaliyoti juda murakkab tarzda bo‘lib o‘tgan.
Amaliyot davomida bolakayning bo‘ynidagi azob berayotgan naycha olib tashlandi. Onasining aytishicha, uzoq muddatli davolanish muolajalari va jarrohlik amaliyotidan so‘ng, Alibek mustaqil nafas ola boshlagan. O‘zini juda yaxshi his qilyapti.
“Avvalombor Allohdan, keyin farzandimning davolanishi va operasiyasi uchun moddiy tomondan yordam qo‘lini cho‘zgan, ma’naviy tomondan qo‘llab- quvvatlagan saxovatpesha yurtdoshlarimizdan, vatandoshlarimizning barcha-barchalaridan mingdan ming bor minnatdorman. Hamisha ularning haqiga duoda bo‘laman” — deydi Alibekni onasi Mohichehra opa.
Shu o‘rinda biz ham Alibekning hayotiga befarq bo‘lmay yordam qo‘lini cho‘zgan, maqolani ulashgan barcha insonlarga o‘z minnatdorchiligimizni bildirib o‘tamiz. Yaxshiliklaringiz sabab bugun to‘rt yashar Alibek og‘riqlardan forig‘ bo‘ldi. Bu oilaning qo‘llari hamisha siz uchun duoda. Qilgan ehsonlaringiz o‘z dargohida qabul bo‘lsin!
Izoh (0)