Andijon shahar hokimligi matbuot xizmati rahbari Gulshanoy Qoshqarovaga nisbatan u Andijon shahar hokimligining rasmiy Telegram kanali orqali jurnalist-bloger Xurshid Daliyevni haqorat qilib, unga nisbatan tuhmat qilgani uchun Ma’muriy javobgarlik to‘g‘risidagi kodeksning 40-moddasi (Tuhmat, ya’ni bila turib yolg‘on, boshqa bir shaxsni sharmanda qiluvchi uydirmalarni tarqatish) bilan ma’muriy ish qo‘zg‘atilgani va ish sudga oshirilgani haqida xabar berilgan edi.
Oliy sud matbuot xizmati rahbari Aziz Obidovning “Daryo”ga ma’lum qilishicha, bugun, 2020-yil 8-yanvar kuni, Gulshanoy Qoshqarovaga nisbatan ma’muriy ish Andijon shahar ma’muriy sudi raisi Akmal Shermatov raisligida ko‘rib chiqildi.
Sud ushbu ma’muriy ish materiallarini har tomonlama va to‘liq o‘rgangan holda Gulshanoy Qo‘chqarovani MJtKning 40-moddasi va 41-moddasida nazarda tutilgan ma’muriy huquqbuzarliklarni sodir etgan deb topdi.
Sud qaroriga ko‘ra Gulshanoy Qoshqarovaga MJtKning 40-moddasi bilan bazaviy hisoblash miqdorining 25 baravari miqdoridagi 5 million 575 ming so‘m jarima jazosi, MJtKning 41-moddasi bilan bazaviy hisoblash miqdorining 20 baravari miqdoridagi 4 million 460 ming so‘m jarima jazosi tayinlangan.
MJtKning 34-moddasiga asosan Gulshanoy Qoshqarovaga uzil-kesil bazaviy hisoblash miqdorining 25 baravari miqdoridagi 5 million 575 ming so‘m jarima jazosi tayinlangan.
Xurshid Daliyev ma’muriy huquqbuzarlik oqibatida yetkazilgan moddiy va ma’naviy zararlarini undirish yuzasidan tegishli hujjatlarni ilova qilgani holda fuqarolik ishlari bo‘yicha sudga da’vo arizasi bilan murojaat qilish huquqiga ega.
Gulshanoy Qoshqarovaning Andijon viloyat IIB boshlig‘i nomiga Xurshid Daliyevni harakatlaridan norozi bo‘lib yozgan arizasi ma’muriy huquqbuzarlik to‘g‘risidagi ish hujjatlarida muhokama etilmagani sababli materialdan ajratilib tegishli tartibda qonuniy baho berish uchun Andijon viloyat IIBga yuborilishi belgilangan.
Qayd etilishicha, qarordan norozi taraflar 2 oy muddat ichida shu sud orqali Andijon viloyat ma’muriy sudiga kassatsiya tartibida shikoyat keltirishga, prokuror protest bildirishga haqli.
Eslatib o‘tamiz, Xurshid Daliyev Andijon viloyatidagi mutasaddilarni tanqid ostiga olgach, ismi-sharifi noma’lum shaxs uni o‘ldirish bilan tahdid qila boshlagan, shundan so‘ng jurnalist “Human.uz” saytida bayonot bilan chiqqan edi.
Xurshid Daliyev tanqidiy-tahliliy chiqishlari bilan e’tiborga tushgan jurnalist. Bir muddat “Yoshlar” telekanalida faoliyat ko‘rsatgan. So‘ng ijodiy faoliyatini “Kun.uz” saytida davom ettirgan. Ayni paytda “Human.uz” saytining asoschisi hisoblanadi.
Izoh (0)