Ijtimoiy tarmoqlarda Andijon shahridagi 4-umumta’lim maktabidagi holat bo‘yicha tarqatilgan videorolik yuzasidan viloyat xalq ta’limi boshqarmasi munosabat bildirdi.
Boshqarma matbuot xizmatiga ko‘ra, 4-umumta’lim maktabi 2019-yili “Obod mahalla” dasturi asosida qo‘shimcha rejaga kiritilib, kapital ta’mirlash ishlari amalga oshirilgan. Maktabda qurilish-ta’mirlash ishlari olib borilganligi sababli o‘quv jarayonlari vaqtincha mazkur hududdagi 3, 21-umumta’lim maktablari, 2-sonli maishiy xizmat ko‘rsatish hamda bank kollejlarida olib borilgan.
Ushbu maktabda qurilish-ta’mirlash ishlari to‘liq nihoyasiga yetkazilib, mavjud o‘quv mebellari va jihozlar vaqtincha saqlangan joyidan olib kelinib, sinf xonalariga joylashtirilgan.
2019-yil 30-dekabr kuni olib kelingan o‘quv jihozlari maktabning asosiy darvozasi oldida tushirilayotgan paytda shu hududdagi ko‘p qavatli uylarda istiqomat qiluvchi maktab o‘quvchilaridan 4 nafari o‘z ixtiyori bilan o‘quv jihozlarini avtotransportdan tushirishda yordam bergan.
“O‘quvchilar va ularning ota-onalari bilan o‘tkazilgan suhbatda maktab rahbariyati tomonidan bolalar hech qanday majburiy mehnatga jalb etilmaganligi, muassasada qurish-ta’mirlash ishlari yakunlanganligi va o‘z sinf xonalarida o‘qishlarini davom ettirishlaridan quvonib yordam berganligi ma’lum bo‘ldi”, — deyiladi xabarda.
Izoh (0)