“Xodim stressda bo‘lgani uchun eski va noto‘g‘ri ma’lumotlarni aytgan”. 78-Termiz saylov okrugi rasmiy munosabat bildirdi

Oliy Majlis Qonunchilik palatasiga saylov o‘tkazuvchi 78-Termiz saylov okrugi “Daryo”da 5-yanvar kuni e’lon qilingan “Surxondaryodagi Saylov kodeksi talablari buzilgani rad etilgandi. Ammo raddiyadagi faktlar ishonarli emas” sarlavhali materialga rasmiy munosabat bildirdi. Rasmiy munosabatning to‘liq matni bilan quyida tanishish mumkin.

Haqiqatan ham 14-dekabr kuni 78-Termiz okrug saylov komissiyasi tomonidan 14-sonli qarori qabul qilingan va 260-uchastka saylov komissiyasi tarkibiga o‘zgartirish kiritilib, nomzodga bevosita buysunuvchi, ya’ni 8-maktab xodimlari komissiya tarkibidan chiqarilgan.

Maqoladagi holatlar yuzasidan 8-maktab o‘qituvchisi Z.Rasulov bilan suhbatlashilganda, u 16-dekabr kuni ish vaqtidan tashqari kechki paytda noma’lum shaxs unga telefon qilgani, o‘zini tanishtirmagani, bu vaqtda Sherobod tumanidan Termiz shahriga qaytayotganligi va charchoq sababli o‘zining stress holatda ekanligini ma’lum qilib, qo‘lida yangi ma’lumot yo‘qligi sababli vaziyatdan chiqish uchun, savollarga e’tibor bermay, eski va noto‘g‘ri ma’lumotlarni aytganini ta’kidladi.

Uchastka saylov komissiyasi raisi M.Oripovaga 78-Termiz saylov ogrugi tomonidan mandat berilgan, biroq u 22-dekabr kuni taqmagan. Shuningdek, Z.Rasulov 8-maktab hududida joylashgan 260-saylov uchastkasida tashkiliy ishlarga, ya’ni saylovga kelgan saylovchilarga qulayliklar yaratish uchun 260-uchastka saylov komissiyasi raisi M.Oripovaning iltimosiga ko‘ra kelgan va saylov jarayoniga aralashmagan. Shu kuni Z.Rasulovning bo‘ynida saylov uchastkasi raisining mandati emas, balki 8-maktab navbatchisining birkasi (beyjik) bo‘lgan.

Bundan tashqari, “‘Turon’ mahalla fuqarolar yig‘ini raisiga bevosita bo‘ysunuvchi xodimlarning uchastka saylov komissiyasi tarkibidagi faoliyati haqida lom-mim demagan”i masalasi bo‘yicha komissiya tarkibiga “Turon” MFY raisiga bevosita bo‘ysunuvchi birorta shaxs a’zo sifatida kiritilmagan. Jumladan, komissiya tarkibiga kiritilgan mahalla faollari va ishsiz fuqarolar “Turon” MFY raisiga bevosita bo‘ysunmaydi yoki MFY raisi ularga ish beruvchi hisoblanmaydi.