Iroq mamlakat hududidan xorijiy davlatlar qo‘shinlarini chiqarishga tayyorlanmoqda

Iroqda xorijiy davlatlar qo‘shinlarini mamlakat hududidan chiqarib yuborishga tayyorgarlik boshlandi. Bu haqda Iroq qurolli kuchlari bosh qo‘mondoni vakili Abdulkarim Halaf ma’lumotlariga asoslanib, Al Arabiya telekanali xabar berdi.

U Bag‘dod xalqaro koalitsiya kuchlarining yerusti va havodagi harakatini cheklaganini aytgan. Halafning ta’kidlashicha, hozirda AQSh va NATO muzokaralar olib bormoqda.

“Iroqdagi xalqaro koalitsiyaning faoliyati harbiy maslahat, qurol-yarog‘ va harbiy mashg‘ulotlar bilan cheklanadi va qurolli kuchlar Iroqdan chiqib ketadi. AQShning so‘nggi zarbalari — bu ahmoqlikdir, unga qarshi jim turish mumkin emas”, — dedi Halaf.

Halafning qo‘shimcha qilishicha, ilgari qabul qilingan rezolyutsiya shuningdek, aviatsiya yordami masalasi bilan ham bog‘liq. Uning fikricha, Iroqda harbiy texnika, qurol-yarog‘ va logistika yordami bilan bog‘liq muammolar mavjud.