Fransiyaning Mets shahri politsiyasi politsiyachilar guruhiga pichoq bilan tashlangan shaxsni yarador qildi. Bu haqda mahalliy amaldorlarga asoslanib, Reuters agentligi xabar bermoqda.
Agentlikning qayd etishicha, erkak hujum qilayotgan vaqtida “Allohu akbar” deya baqirgan. U politsiyachilarga pichoq bilan hamla qilgan, politsiyachilar esa uning yonboshiga jarohat yetkazgan.
Politsiya ma’lumotlariga ko‘ra, hujum qilgan shaxs terrorchilar bilan aloqadorligi uchun kuzatuvda bo‘lgan. Gumon qilinuvchining shaxsi hozircha oshkor etilmayapti.
3-yanvar kuni Parij chekkasidagi Viljyuifda 22-yoshli jinoyatchi pichoq ko‘tarib, o‘tkinchilarga tashlangan edi. Hujum vaqtida u “Allohu akbar” deya baqirgan. Ma’lumotlarga ko‘ra, hujum oqibatida bir erkak halok bo‘lgan, ikki ayol yaralangan. Politsiya hujum qilgan shaxsni o‘ldirgan.
Fransiya so‘nggi yillarda bir necha bor terrorchilarning hujumlari ostida qoldi. Eng yirik hujum 2015-yil noyabrida Parijda yuz bergan edi — o‘shanda ketma-ket yuz bergan teraktlar oqibatida 130 kishi halok bo‘lgan edi.
Izoh (0)