Eron 2015-yili mamlakat hukumati va olti vositachi mamlakat o‘rtasida erishilgan yadroviy kelishuvdan to‘liq chiqishini e’lon qildi. Bu haqda Associated Press agentligi xabar bermoqda.
Eron davlat televideniyesi orqali tarqatilgan bayonotga ko‘ra, Eron 2015-yilgi yadroviy kelishuvga muvofiq o‘rnatilgan biror bir cheklovga ortiq bo‘ysunmaydi.
Eron bilan imzolangan yadroviy kelishuvRasman “Birgalikdagi harakatlar rejasi” deb nomlanadigan kelishuv 2015-yil iyulida imzolangan edi. Hujjatni bir tomondan Eron, boshqa tomondan xalqaro vositachilar oltiligi — AQSh, Rossiya, Xitoy, Buyuk Britaniya, Fransiya va Germaniya imzolagan edi. Hujjatda, jumladan, Eron uranni qaysi darajagacha boyitishi va qancha miqdorda boyitilgan uran saqlashi mumkinligini belgilab berardi. Darajalar shunday o‘rnatilgan ediki, bunda Eron yadroviy energetikani rivojlantirishi mumkin edi, biroq yadroviy qurol yarata olmasdi. Kelishuv shartlariga rioya etish evaziga Eronga qarshi sanksiyalar bekor qilingan edi.
Bungacha Eron yadroviy kelishuv shartlarini bosqichma-bosqich rad etib kelayotgan edi — bunga AQSh 2018-yil may oyida kelishuvdan bir tomonlama chiqib ketgani sabab bo‘lgan edi. Kelishuvni imzolagan qolgan mamlakatlar uni saqlab qolishga chaqirayotgan edi.
Izoh (0)