Buxoro tarixiy markazidagi yomg‘ir yog‘ganda mashinalar loyga botadigan ko‘cha ta’mirlanmoqda (foto)

Bugun, 6-yanvar kuni Buxoro shahrining Arabon ko‘chasida 2020-yil 6-yanvar kuni yog‘ingarchilik natijasida mashinalarning harakatlanishida yuzaga kelgan noxush vaziyat hamda yo‘lning ta’mirtalab holatlari aks etgan video e’lon qilingan edi.

Mazkur holat yuzasidan Buxoro shahri hokimligi matbuot xizmati “Daryo”ga ma’lumot taqdim etdi.

Qayd etilishicha, hozirgi kunda Arabon ko‘chasida ta’mirlash ishlari olib borilmoqda.

“Ko‘cha turistik yo‘nalishga kiritilgan, bugungi kunda u yerda kanalizatsiya, ya’ni suvoqava suvlarini chiqarish uchun quvur yetkazilishi, ichimlik suvi ta’minotini yetqazish uchun quvurlar yotqizilishi, ko‘chalarni yoritgichlar bilan ta’minlash ishlari, aloqa kabellarini o‘tqazish, ishlari amalga oshirilib, yo‘lning bir qismida bruschatkalar (yer uchun maxsus toshlar) terib chiqilgan.

Arabon ko‘chasi Buxoroning eski shahar qismi ‘tashrif qog‘oz’laridan biri hisoblanadi. Demakki, bu ko‘chaning holatini yaxshilash, yo‘llarni ta’mirdan chiqarish eng birinchi galda viloyat turistik salohiyatiga, iqtisodiyotiga ijobiy ta’sir ko‘rsatishi turgan gap, mamlakatda olib borilayotgan har qanday islohotning natijasi eng avvalo inson manfaatlari yo‘lida qilinayotgan ekan, farovonlik yo‘lida bajarilayotgan rejalarimiz albatta mazkur yo‘nalish bo‘yicha ham bo‘y ko‘rsatadi”, — deyiladi xabarda.

Mazkur ko‘chaning obodonlashtirish ishlari rejaga asosan 2020-yilning mart oyida o‘z yakuniga yetishi ko‘zda tutilgan. Ko‘chaning qurilish ishlari “Development House” MChJ tomonidan amalga oshirilmoqda. Uzunligi 600 metrga teng Arabon ko‘chasining ta’mirlash ishlarining umumiy qiymati 4 900 000 000 so‘m.

Hozirda rejalashtirilgan ishlarning 50 foizi bajarilgan, ko‘cha ohaktoshlar bilan ta’mirlanmoqda. 500 metrga kanalizatsiya-kommunikatsiya tizimlari o‘rnatildi (70 foiz), o‘tkazilishi rejalashtirilgan ichimlik suvlari ham yetib keldi, gaz quvurlarni o‘tkazish rejasi 40 foizga bajarildi. Undan tashqari yoritish tizimlari va telekommunikatsiya tizimlarini yangilash ko‘zda tutilgan, deyiladi xabarda.