Markaziy saylov komissiyasi: Soat 11:00 ga qadar saylovlarda qonun buzilish holatlari bo‘yicha ma’lumot kelib tushmadi

Oliy Majlisi Qonunchilik palatasiga saylov o‘tkazuvchi 25 ta Saylov okruglaridagi 1730 ta saylov uchastkasida takroriy ovoz berish jarayoni o‘tkaziladi. Bu haqda 5-yanvar kuni Xalqaro matbuot markazida bo‘lib o‘tgan brifingda Markaziy saylov komissiyasi raisi Mirzo Ulug‘bek Abdusalomov ma’lum qildi, deya xabar bermoqda “Daryo” muxbiri Musulmonbek Ibrohimov.

Eslatib o‘tamiz, 22-dekabr kuni bo‘lib o‘tgan saylov yakunlariga ko‘ra, 22 ta saylov okrugida birorta ham nomzod berilgan ovozlarning yarmidan ko‘pini to‘play olmagan, uchta saylov okrugida esa saylov natijalarini aniqlashda arifmetik xatoga yo‘l qo‘yilgani bois eng ko‘p ovoz olgan ikki nomzod ikkinchi turga qolgan edi.

Bugun O‘zbekiston Respublikasi Oliy Majlisi Qonunchilik palatasiga saylov o‘tkazuvchi 25 ta Saylov okruglaridagi 1730 ta saylov uchastkasida takroriy ovoz berish jarayoni o‘tkaziladi.

Ushbu okruglardagi saylovchilar soni 3 million 148 ming 921 nafarni tashkil etadi.

Shuningdek, Xalq deputatlari viloyat kengashlariga saylov o‘tkazuvchi 95 ta Saylov okrugidagi 1104 ta saylov uchastkasida hamda Xalq deputatlari tuman va shahar kengashlariga saylov o‘tkazuvchi 587 ta Saylov okrugidagi 1117 ta saylov uchastkasida takroriy ovoz berish bo‘lib o‘tadi.

Ovoz berish jarayonlari boshlangandan soat 11:00 ga qadar saylov jarayonlarida qonun buzilish holatlari bo‘yicha ma’lumot kelib tushmadi.

Mirzo Ulug‘bek Abdusalomov, Markaziy saylov komissiyasi raisi