Madina Muxtorova: “Bolamni men urdim — ona sifatida bunga haqqim bormi?” (video)

Taniqli aktrisa Madina Muxtorovaning o‘g‘li (13 yoshli M.O.) bilan bog‘liq vaziyat bir necha kundan beri ijtimoiy tarmoqlarda faol muhokama qilinmoqda. Ushbu holat yuzasidan 4-yanvar kuni Yunusobod tumani IIB FMBda jurnalist va blogerlar uchun brifing tashkil etildi.

Avvalroq ushbu brifingda chiqish qilgan Yunusobod tumani prokurori Habibulla Mirsoatov, o‘z vakolatidan kelib chiqib, 13 yoshli M.O. bilan bog‘liq holat yuzasidan 4-yanvar kuni Jinoyat kodeksining 109-moddasi 2-qismi bilan jinoyat ishi ochgani haqida xabar berilgan edi.

“Daryo” muxbiri Mirolim Isajonovning xabar berishicha, brifingda aktrisa Madina Muxtorova ham qatnashib, OAV vakillarining savollariga qisman javob berdi. Jumladan, u kenja o‘g‘li (13 yoshli M.O.) bilan doimiy birga yashashini ta’kidlagan.

JEK (xususiy uy-joy mulkdorlari shirkati)dan ham so‘rab ko‘rishingiz mumkin — propiskada bolam bilan bir o‘zim turaman. Besh xona, keng uy. Xudoga shukr, akalarining diplomi, ikkitadan bolasi bor. Uy-joyi, mashinasi yetarli. Kelinlarim bilan urishmagan, ajrashmagan. Oila butun. Kenja o‘g‘lim doim men bilan.

Men hozir nima bo‘layotganini anglayotganim yo‘q, lekin nima bo‘lganini aytib beraman. Xullas, kenja o‘g‘lim juda qattiq nazoratda. Maktabda ikki-uchta darsni qoldirgan. Maktabga bormagan kunlari o‘qituvchilari akasiga qo‘ng‘iroq qilgan, darsga kelmaganini aytgan. Akasi unga ota bo‘lsa, kelinoyisi onadek.

Bolamni men urdim — ona sifatida bunga haqqim bormi? O‘g‘lim Sanjar, kelinimdan boshqa hech qanday qanotlarim yo‘q — agar och qolsam, qoqilsam, qaysi biringiz: “Yaxshimisan? Qorning ochmi? Uydamisan? Nima gap?”, deb so‘rab kelasiz?

Madina Muxtorova, aktrisa

Kuni kecha M.O. bilan bog‘liq holat yuzasidan bir ayolning videomurojaati paydo bo‘lgandi. Videodagi ayol o‘zini Madina Muxtorovaning qarindoshiman deya tanishtirib, M.O.ga muttasil azob berib kelinayotgani haqidagi gaplar rostligini ta’kidlagan. Aktrisa bu videomurojaatga shunday munosabat bildirdi:

Bolam uchun, men uchun jon kuydirayotgan, xavotir olayotgan odamlarga katta minnatdorchilik bildiraman. Hozir mening kerak va kerakmas qarindoshlarim ko‘payib ketdi.

U qarindoshimni uyimga kirgizmay, eshikni berkitib oldim. Jurnalistlar bilan birga javob olish uchun kelgandi. Uning manzilini ham beraman, o‘ziga savol berasiz. Hamma narsani qo‘zg‘agan men emas, ko‘proq o‘sha ayol.

“Yerto‘lada saqlashibdi”, degan gaplarni ham undan so‘ranglar. Men hech narsani bilmayman. Kecha uyigacha ham qidirib bordim. Shunchalik yaqin qarindoshim ekanki, uyidan topolmadim. Telefonini ham ko‘tarmadi.

Madina Muxtorova, aktrisa

Madina Muxtorova ijtimoiy tarmoqlarda uning ikki o‘g‘li va kelini ishtirokida tarqalgan video haqidagi savolga javob berarkan (unda M.O. o‘zi bilan hammasi joyida ekani, akasi va kelinoyisini yaxshi ko‘rishi, uni hech kim urmagani haqida gapiradi): “Meni tinch qo‘yinglar, desam ham majburlashdi. Blogerlar kelib, olib ketishdi. Kimligini bilmayman”, dedi.