Turkiyada Nissan kompaniyasining sobiq rahbari Karlos Gonning Yaponiyadan Livanga qochishini tashkillashtirishga aloqador yetti kishi, jumladan, to‘rt nafar uchuvchi qo‘lga olindi, deb xabar beradi Meduza.
31-dekabr kuni moliyaviy firibgarlikda gumonlangan Karlos Gon yashirincha Tokiodan shaxsiy samolyotida Istanbulga, u yerdan boshqa samolyot bilan Bayrutga uchib ketgan.
Bloomberg nashrining yozishicha, parvozlar turklarning MNG Holding xoldingi xodimlari tomonidan amalga oshirilgan. Gonni kontrabasga mo‘ljallangan futlyar ichiga yashirib, olib o‘tishgan. Istanbul aeroporti rahbariyati Gonning samolyot bortida ekanligidan bexabar bo‘lgan. Taxminlarga ko‘ra, qochishni amalga oshirishda Livan va AQShdagi xususiy qo‘riqlash kompaniyalari yordam ko‘rsatgan.
Karlos Gon 2018-yilning noyabrida Yaponiyada hibsga olingan edi. U 80 million dollarni yashirganlikda, shuningek, Nissan’ga 16 million dollar zarar keltirganlikda ayblangan. Nissan uni direktorlar kengashi raisligidan ozod qilingan.
2019-yilning martida Gonni garov evaziga qo‘yib yuborishgan, biroq xorijga chiqib ketmasligi uchun pasporti olib qo‘yilgan. Gonning o‘zi barcha ayblovlarni rad etgan. Karlos Gon Fransiya, Braziliya va Livan fuqarosi hisoblanadi. U Bayrutda o‘sgan. 8-yanvar kuni Gon Bayrutda matbuot anjumani o‘tkazish niyatida.
Izoh (0)