Chinozda 20 yashar uch yigitning “qo‘lbola bomba”si 8-sinf o‘quvchisini o‘ldirdi

Chinozda uch yigit temir quvurga oltingugurt va magma aralashmasini solib, yoqishi oqibatida 8-sinf o‘quvchisi halok bo‘ldi. Bu haqda IIV Huquqbuzarliklar profilaktikasi bosh boshqarmasi xabar berdi.

Toshkent viloyatining Chinoz tumanida 1-yanvar kuni soat taxminan 16:30 da “Yangi” mahalla fuqarolar yig‘inida yashovchi H.E., S.A. va B.M. (barchasi 1999-yilda tug‘ilgan) Sarbozor ko‘chasida temir quvurga qo‘lbola usulda oltingugurt va magma aralashmasini solib, yoqqan vaqtida temir quvur shu yerda bo‘lgan 1-maktabning 8-sinf o‘quvchisi, 2004-yilda tug‘ilgan S. G‘.ga kelib tekkan.

Oqibatda S.G‘. jarohat olib kasalxonaga yotqizilgan va ko‘rsatilgan tibbiy muolajalarga qaramay shu yerda vafot etgan.

IIV Huquqbuzarliklar profilaktikasi bosh boshqarmasidan xabar berishlaricha, H.E., S.A. va B.M. qo‘lga olingan. Holat yuzasidan Jinoyat kodeksining 250-1-moddasi 3-qismi (Odam o‘limiga sabab bo‘lgan pirotexnika buyumlarining qonunga xilof muomalasi) bilan jinoyat ishi qo‘zg‘atilgan.