25-dekabr kuni “O‘zbekoziqovqatxolding” kompaniyasi tomonidan Toshkent viloyatidagi go‘sht va go‘sht mahsulotlari ishlab chiqarishga ixtisoslashgan “Master Delikatesov”, “ProMeat” mas’uliyati cheklangan jamiyatlariga press-tur tashkil etildi.
Go‘sht va go‘sht mahsulotlari ishlab chiqarish oziq-ovqat sanoatining muhim tarmoqlaridan hisoblanadi. Ma’lumotlarga ko‘ra, bugungi kunda mamlakatimizda yiliga 200 ming tonnadan ziyod go‘shtni qayta ishlash quvvatiga ega 381 ta korxona faoliyat ko‘rsatmoqda.
“O‘zbekoziqovqatxolding” misolida olinsa, ayni vaqtda kompaniya tarkibida jami 400 dan oshiq korxona mavjud bo‘lib, ularning 24 tasi kolbasa va go‘sht mahsulotlari ishlab chiqarishga ixtisoslashgan. Mazkur korxonalar “Rozmetov”, “Tegen”, “MD” kabi brendlar ostida o‘z mahsulotlarini iste’mol bozoriga chiqarmoqda.
Sir emas, mamlakatimizda go‘sht va qayta ishlangan go‘sht mahsulotlari tannarxi boshqa iste’mol mahsulotlari tannarxiga nisbatan yuqori. Bu ozuqa-yem mahsulotlari tannarxining yuqoriligi, ozuqa-yem yetishtirish uchun yer maydonlarining yetishmasligi, joylarda chorvachilik mahsulotlari yetishtirish va qayta ishlash komplekslarining yetarlicha rivojlanmagani bilan bog‘liq. Mazkur muammolarga yechim topish tarmoqning klasterlashuvi, bir xil yoki bir-biriga bog‘liq sohalarida faoliyat yuritadigan va geografik jihatdan bir-biriga yaqin bo‘lgan korxonalar hamkorligini yo‘lga qo‘yishni ham taqozo etadi.
E’tiborlisi, “O‘zbekoziqovqatxolding” tarkibidagi go‘sht mahsulotlari ishlab chiqaruvchi korxonalar ana shunday samarali usullardan foydalanmoqda. Toshkent viloyatida faoliyat ko‘rsatayotgan “Master Delikatesov” va “ProMeat” mas’uliyati cheklangan jamiyatlari bunga yaqqol misoldir.
“Master Delikatesov” mas’uliyati cheklangan jamiyati 2003-yilda tashkil topgan bo‘lib, faoliyatining ilk bosqichlarida asosan 10 xil turdagi mahsulot ishlab chiqargan. Bugungi kunda korxonada Germaniya, Avstriya va Belarus davlatlaridan keltirilgan zamonaviy uskunalar yordamida 150 xildan ortik kolbasa va go‘sht mahsulotlari ishlab chiqarilmoqda.
Aholini yangi, sifatli mahsulot bilan doimiy ravishda ta’minlab borish maqsadida Toshkent shahar hududida franchayzing asosida 33 ta maxsus savdo do‘konlari faoliyat olib bormoqda. Bundan tashqari, respublikamiz hududida, jumladan Navoiy, Buxoro, Qashqadaryo, Namangan va Farg‘ona viloyatlarining yirik savdo majmualariga ham korxona mahsulotlari yetkazilib beriladi.
Korxona sifat menejmenti tizimi ISO/IEC 9001:2009 hamda Oziq-ovqat mahsulotlari xavfsizligining menejment tizimi ISO/IEC 22000:2005 talablari bo‘yicha sertifikatlashtirilgan.
“ProMeat” mas’uliyati cheklangan jamiyati 2018-yilda tashkil etilgan bo‘lib, mazkur korxona yiliga 3000 bosh qoramolni “Feedlot” (ochiq boquv maydoni) texnologiyasi asosida bo‘rdoqichilikka boqish quvvatiga ega. O‘zbekistonda yagona sanalgan ushbu texnologiyani joriy etishga Dairy Global Experts xorijiy kompaniyasi yordam bergan.
Korxonaning yem-hashak yetishtirishga mo‘ljallangan o‘z ekin maydoni bor. Zamonaviy qushxonasi mavjud.
Bugungi kunda korxona nafaqat “Master Delikatesov” MChJga xomashyo yetkazib bermoqda, shuningdek o‘z savdo shahobchalari orqali aholini sifatli va hamyonbop go‘sht, sut bilan ta’minlamoqda.
MChJ bo‘rdoqichilik va so‘yish qoidalariga muvofiqligini tasdiqlovchi MS 1500: 2009 va TS OIC / SMIIC 1: 2011 talablariga javob beradigan HLL-8471-TR sertifikatlariga ega.
Press – tur davomida OAV vakillari mazkur korxonalar faoliyati bilan yaqidan tanishdi.
“O‘zbekoziqovqatxolding” kompaniyasi Axborot xizmati
Kanalga ulanish @uzboziqovqat
Reklama huquqi asosida.
Izoh (0)