Qashqadaryo viloyatidagi “Yakkabog‘—Chiroqchi” yo‘lining Chiroqchi tumani “Ko‘ktosh” mahallasidan o‘tgan 35-kilometrida 28-dekabr kuni soat taxminan 14:30 da bir necha insonning o‘limi bilan bog‘liq yo‘l-transport hodisasi yuz berdi. Bu haqda IIV huzuridagi Tergov departamenti xabar bermoqda.
Nexia avtomobilini boshqarib ketayotgan 20 yoshli F.J. o‘zidan oldindagi avtomobilni quvib o‘tish maqsadida yo‘lning qarama-qarshi yo‘nalishiga chiqqan, biroq quvib o‘tishni yakunlay olmay, qarshisidan kelayotgan “Kamaz” yuk mashinasi bilan to‘qnashuv sodir etgan.
“Oqibatda Nexia haydovchisi F.J. va uning uch yo‘lovchisi hodisa joyida halok bo‘lgan”, — deyiladi Tergov departamenti axborotida.
Holat yuzasidan Jinoyat kodeksining 266-moddasi 3-qismi “a” bandi (odamlar o‘limiga olib kelgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan, dastlabki tergov harakatlari olib borilmoqda.
Izoh (0)