Tojikiston prezidenti Emomali Rahmon respublikada nashr etilgan badiiy adabiyotlar sonini ko‘paytirish aholiga va o‘qishga qiziqish tuyg‘usini uyg‘otishni buyurdi, deb xabar bermoqda Asia-Plus.
“Prezident Ijroiya apparati xodimlaridan tortib har bir shaxs yiliga kamida 5 ta kitob o‘qishi kerak. Bu masala jiddiy nazoratga olinishi lozim. Biz internet va boshqa narsalar haqida gapiryapmiz, lekin agar biror shaxs kitob o‘qimasa, uning nutqi ravon bo‘lmaydi, so‘zamol va notiq bo‘lolmaydi”, — degan prezident 26-dekabr kuni Parlamentga yillik rejalar murojaatida.
Emomali Rahmon kutubxonalar muhim ilmiy va madaniy markazlarga aylanishi kerakligini ta‘kidlagan va Prezident Ijroiya apparatidan tortib, barcha vazirliklar, mahalliy hokimiyatlar, kompaniyalar, maktab va universitetlargacha barchasiga badiiy kitoblar to‘plangan kutubxona tashkil etish majburiyatini yuklagan.
U, shuningdek, 2021-yilda mamlakat mustaqilligining 30 yilligi arafasida prezident fondi hisobidan “Tojikistonliklar” kitobi chop etilib har bir tojikistonlikka bepul tarqatilishini ma‘lum qilgan. Fan va ta‘lim vazirligi, Madaniyat vazirligi va Fanlar akademiyasiga esa kitoblarni chet tiliga tarjima qilib, chop etib, ularning elektron versiyasini internetda tarqatish vazifasini yuklagan.
Avvalroq Emomali Rahmon Tojikistonda masjid qurayotganlarni maktablar qurishga chaqirgani haqida xabar berilgan edi.
Izoh (0)