Turkmanistonda birinchi prezident Saparmurat Niyozovning vafoti kunida xotira marosimlari o‘tkazilishiga qat’iy cheklovlar joriy qilindi. Bu haqda 23-dekabr kuni o‘z manbalariga tayanib “Xronika Turkmenistana” xabar berdi.
Qayd etilishicha, 19-dekabr kuni Ashxobodda prezident apparati, bosh vazir o‘rinbosarlari, Majlis (Parlament) raisi va boshqa bir qator rasmiylar ishtirokida yopiq yig‘ilish bo‘lib o‘tgan. Unda 21-dekabr — Saparmurat Niyozovning vafoti kunida faqat Axshoboddagi yodgorlikka gullar qo‘yish marosimini o‘tkazishga qaror qilingan.
Yig‘ilishdan so‘ng Milliy xavfsizlik kengashining hududiy boshqarmalari hokimliklar va Xalq maslahati a’zolari, Parlament deputatlari va yirik korxona rahbarlarini 21-dekabr kuni mahalliy darajada xotirlash marosimlari o‘tkazilmasligi to‘g‘risida xabardor qilgan.
Ilgari Saparmurat Niyozovning vafoti kunida xotirlash marosimlarini mamlakatning istalgan hududida korxona rahbarlari, shu jumladan nodavlat tashkilotlari tashkil qilishi mumkin bo‘lgan.
Izoh (0)