O‘zbekiston bo‘yicha 2048 ta maktab ichimlik suvi bilan ta’minlanmagan. Bu haqda Oliy Majlis Senati Kengashining 24-dekabr kuni bo‘lib o‘tgan kengaytirilgan yig‘ilishida ma’lum qilindi, deya xabar bermoqda “Daryo” muxbiri Musulmonbek Ibrohimov.
Ma’lum qilinishicha, Andijon viloyatida mavjud maktablarning 55 foizi (406 ta) ichimlik suvi ta’minotiga ulangan bo‘lsa-da, nosozliklar tufayli tarmoq ishlamaydi. Samarqand viloyatining 165 ta, Toshkent viloyatining 117 ta maktabida ichimlik suvi tashib keltirilmoqda.
Mamlakat bo‘yicha 1 533 ta bolalar bog‘chasida ichimlik suvi tashib keltiriladi. Samarqand viloyatida 308 ta, Farg‘ona viloyatida 231 ta, Buxoro viloyatida 211 ta, Namangan viloyatida 197 ta va Qashqadaryoda 170 ta bog‘chada suv uchun katta hajmli gigiyenik suv idishlari o‘rnatilmagan.
Bundan tashqari, 343 ta bog‘chada ovqat tayyorlash uchun yoqilg‘i turi sifatida o‘tindan foydalanib kelinmoqda. Bu holat Andijon viloyatida 113 ta, Farg‘ona viloyatida 107 ta, Namangan viloyatida 41 ta va Samarqand viloyatida 33 ta maktabgacha ta’lim tashkilotida mavjud.
Qayd etilishicha, O‘zbekistondagi 5 854 ta davlat bog‘chalarida oshxonalarning moddiy-texnik holatini yaxshilash uchun 391 milliard so‘m mablag‘ talab etiladi.
Izoh (0)