O‘zbekistonda 22-dekabr kuni tonggi soat 8:00 dan boshlab mamlakatdagi barcha saylov uchastkalari ochildi. Unda 20,5 milliondan ortiq saylovchi Oliy Majlis Qonunchilik palatasi va mahalliy Kengashlar deputatligiga nomzodlar uchun ovoz berishi mumkin.
Eslatma: Saylovchilar nimalarni bilishi lozim?
22-dekabr kuni Oliy Majlis, viloyat, tuman va shaharlar deputatligi uchun saylovlar bo‘lib o‘tadi. Saylovlarda ovoz berishda ishtirok etadigan saylovchilar quyidagilarni bilishi lozim:- ovoz berish ertalab soat 8:00 dan kechki 20:00 ga qadar davom etadi;
- saylovchida fuqarolik pasporti yoki yangi namunadagi haydovchilik guvohnomasi bo‘lishi lozim;
- qaysi saylov uchastkasida ovoz berish haqida ma’lumotga ega bo‘lmasangiz elections.uz/uz/site/polling-station manziliga kirib, tug‘ilgan sana va pasport raqamini kiritgan holda ertaga ovoz beradigan saylov uchastkangizni aniqlab oling;
- saylov byulletenini yashirin ovoz berish kabinasida yoki xonasida saylovchining yolg‘iz o‘zi to‘ldirishi shart;
- ovoz berish tanlangan nomzodning familiyasi to‘g‘risida, o‘ng tomonda joylashgan bo‘sh kvadratga “➕” yoki “✔️” yoxud “✖️” belgisini qo‘yish lozim;
- saylov byulletenini mustaqil ravishda to‘ldirish imkoniyatiga ega bo‘lmagan saylovchi o‘z xohishiga ko‘ra yashirin
- ovoz berish xonasiga boshqa shaxsni taklif qilishga haqli;
- ovoz beruvchi to‘ldirilgan saylov byulletenini saylov qutisiga tashlaydi;
- buzib qo‘yilgan saylov byulleteni saylovchining iltimosiga ko‘ra yangisiga almashtirilishi mumkin.
O‘zAning qayd etishicha, saylovchilarning 1 million 721 ming 358 nafari yoki 8,4 foizi xorijiy davlatlarda tuzilgan 55 saylov uchastkasiga biriktirilgan. Qolgan qismi O‘zbekiston hududidagi 10 ming 260 saylov uchastkasidan birida ovoz beradi.
Ma’lumotlarga ko‘ra, O‘zbekiston va xorijiy davlatlarda tashkil etilgan 55 saylov uchastkasida 12-dekabrdan 18-dekabr soat 18:00 ga qadar saylovchilarning muddatidan oldin ovoz berish jarayoni o‘tkazildi. Unda O‘zbekiston bo‘yicha 59 ming 226 saylovchi hamda xorijiy davlatlarda 89 ming 807 saylovchi-vatandoshlarimiz muddatidan oldin ovoz bergan.
Bu yilgi saylovlarda har bir uchastkada ko‘zi ojiz fuqarolar uchun birinchi marta brayl yozuvidagi byulletenlarda ovoz berish tashkil etilayotir. Shu bilan birga, hududlarda ro‘yxatga olingan yoshi ulug‘ insonlar, nogironlar va jismoniy imkoniyati cheklangan fuqarolarga uy sharoitida ovoz berish imkoniyati yaratilgan.
Markaziy saylov komissiyasi tomonidan jami 825 xorijiy davlatlar va xalqaro tashkilotlarning kuzatuvchilari akkreditatsiyadan o‘tkazilgan va ularga mandatlar topshirildi. Ular 9 xalqaro tashkilot va 41 xorijiy davlat vakillaridir.
Saylovlarda ishtirok eting, o‘z kelajagingiz uchun befarq bo‘lmang!
Izoh (0)