“Adolat” partiyasi yetakchisi Narimon Umarov Toshkentdagi 683-saylov okrugida ovoz berdi

“Adolat” sotsial-demokratik partiyasi yetakchisi Narimon Umarov Oliy Majlis Qonunchilik palatasi va xalq deputatlari kengashiga saylovlarda ovoz berdi, deya xabar bermoqda “Daryo” muxbiri Musulmonbek Ibrohimov.

Narimon Umarov rafiqasi bilan birga 10:15 da 683-saylov uchastkasiga keldi. Ovoz berishdan so‘ng jurnalistlar bilan muloqot qilgan “Adolat” partiyasi yetakchisi xalq bugun O‘zbekiston kelajagi uchun to‘g‘ri tanlovni amalga oshirishiga umid bildirdi.

O‘tgan 90 kun davomida “Adolat” partiyasi ham boshqa partiyalar qatori o‘z g‘oyalarini xalqqa yetkazishga harakat qildi. Xalqimiz vakillarining partiyamizga murojaatlari soni shu 90 kun ichida 10 barobarga oshdi. Bu — aytgan har bir gapimiz, e’lon qilgan maqsadlarimiz xalqning diliga yetib bordi, degani.

Xalqimiz ta’lim, sog‘liqni saqlash, sud-huquq tizimi, umuman, barcha sohalarda islohotlarga mos ravishda aytgan maqsadlarimizni ro‘yobga chiqarishimizni kutyapti, biz xalqimiz oldida bunga so‘z berganmiz. Bugun xalqimiz “Adolat” partiyasini ko‘proq qo‘llab-quvvatlasa, biz bu maqsadlarni amalga oshirishga va’da beramiz.

Bu galgi saylov shaffof, ochiq o‘tyapti, bunaqasi O‘zbekiston tarixida birinchi marta bo‘lyapti. Har bir nomzod, har bir partiyaga hech bir muammo bo‘lgani yo‘q. O‘zimiz xohlagan tadbirni o‘zimiz xohlagan formatda, o‘zimiz xohlagan shaklda, aksiyalar o‘tkazishimiz — birinchi marta bo‘ldi. Albatta, bu bizga katta imkoniyat yaratadi. Shu bilan birga bu ochiqlik har bir partiya uchun katta maktab bo‘ldi. Bu ochiqlik o‘zidan o‘zi bo‘lmaydi, xalqni oldiga chiqib, va’da berdikmi, uni amalga oshirish kerak.

Saylov kampaniyasi davomidagi debatlarni eshitdinglar. Albatta, fikrlar xilma-xil. Lekin bugungi taraqqiyotimizda bosqichma-bosqich bo‘ladigan o‘zgarishlarni biz ayta oldik. Albatta, saylovchilarimiz orasida ba’zi bir masalalarga alohida e’tibor berish bo‘yicha taklif bildirganlar ham bo‘ldi. Saylovdan so‘ng o‘z dasturimizni ushbu fuqarolarimizning fikrlari asosida to‘ldirib boramiz. Bu kelgusi besh yillik davomida bo‘ladigan doimiy ishlarimizdan biri bo‘ladi.

Narimon Umarov, “Adolat” SDP yetakchisi