YXHT vakili: Shavkat Mirziyoyevning tuhmat va haqorat uchun qamoq jazosini bekor qilish haqidagi qarorini olqishlayman

Yevropada xavfsizlik va hamkorlik tashkilotining OAV erkinligi masalalari bo‘yicha vakili Shavkat Mirziyoyevning tuhmat va haqorat uchun qamoq jazosini bekor qilish haqidagi qarorini olqishlab chiqdi. Bu haqda Axborot va ommaviy kommunikatsiyalar agentligi bosh direktori Komil Allamjonov Telegram’dagi rasmiy kanalida ma’lum qildi.

Eslatib o‘tamiz, Prezident Shavkat Mirziyoyev joriy yilning 22-noyabr kungi yig‘ilishda barcha amaldorlarni OAVni qat’iy hurmat qilish, ular bilan doimiy hamkorlik qilish va kibr-u havoga berilmaslikka chaqirgandi. 17-dekabr kuni Shavkat Mirziyoyev Konstitutsiya va qonun ustuvorligini ta’minlashga qaratilgan qarorni imzolagani ma’lum qilingandi.

O‘zbekiston Prezidenti Shavkat Mirziyoyevning tuhmat va haqorat uchun qamoq jazosini bekor qilish haqidagi qarorini olqishlayman. Bu OAV erkinligi va rivoji uchun yangi qadamdir.

Biz media erkinlikni ta’minlashga oid qonunchilik islohotlarini diqqat bilan kuzatib boramiz va qo‘llab-quvvatlaymiz

Arlem Dezir, Yevropada xavfsizlik va hamkorlik tashkilotining OAV erkinligi masalalari bo‘yicha vakili

Avvalroq AQSh davlat departamenti Janubiy va Markaziy Osiyo ishlari byurosi ham o‘zining Twitter’dagi sahifasi orqali O‘zbekiston Prezidentining ushbu topshirig‘ini olqishlab chiqqandi.