Nagoya universitetining ilmiy kengashi O‘zbekiston Prezidenti Shavkat Mirziyoyevga universitet faxriy doktori unvonini berish to‘g‘risida qaror qabul qildi, deb xabar bermoqda Prezident matbuot xizmati.
Ushbu unvon davlat rahbarining ta’lim sohasini rivojlantirishga qo‘shgan ulkan hissasi hamda ilm-fan va akademik almashinuvlarni har tomonlama qo‘llab-quvvatlagani uchun, shuningdek, O‘zbekistonda yangi bosqichda amalga oshirilayotgan iqtisodiyotni liberallashtirish va barqaror taraqqiyotga erishish borasidagi islohotlar e’tirofi sifatida berilgan.
Universitetda uning rahbariyati, professor va o‘qituvchilari, talabalari hamda Nobel mukofoti sovrindorlari ishtirokida davlatimiz rahbariga ushbu yuksak ilmiy unvonni topshirishga bag‘ishlangan tantanali marosim o‘tkazilgan.
Xabarda aytilishicha, marosimda Nagoya universiteti prezidenti Seyichi Matsuo so‘zga chiqib, O‘zbekiston rahbari ikki mamlakat o‘rtasida ilm-fan sohalaridagi aloqalarni rivojlantirishga katta e’tibor qaratayotgani, ushbu qaror ta’lim sohasidagi uzoq muddatli va istiqbolli hamkorlikni yanada kengaytirishga tomonlarning intilishi ifodasi ekanini ta’kidladi.
Shavkat Mirziyoyev o‘z nutqida o‘zbek va yapon xalqlarini o‘xshash milliy va axloqiy qadriyatlar bilan birga ilm-fan va tafakkurga, kamolotga doimo intilib yashash kabi ezgu fazilatlar birlashtirib turishini ta’kidladi. Zamonaviy dunyoda inson kapitali, intellektual salohiyat, innovatsion g‘oyalar, yuqori texnologiyalar jadal va barqaror taraqqiyotning fundamental asosini tashkil qilayotganini qayd etdi.
“Bu unvonni, men avvalo O‘zbekiston xalqiga ko‘rsatilgan ehtirom ifodasi, deb qabul qilaman va buning uchun Nagoya Universiteti rahbariyatiga, uning ilmiy jamoasiga chuqur minnatdorchilik bildiraman”, — degan prezident.
Shuningdek, davlat rahbari O‘zbekiston – Yaponiya hamkorligida ulkan ishlar amalga oshirilganini qayd etib, ayni vaqtda bu borada ishga solinmagan imkoniyatlar ham borligini ta’kidlagan hamda qator takliflarni ilgari surgan. Bu boradagi hamkorlikni yanada kengaytirish maqsadida ilmiy-akademik almashuvlar va texnologiyalar transferi bo‘yicha O‘zbekiston-Yaponiya qo‘shma fondini tashkil qilishni taklif etgan
Qayd etilishicha, ushbu fond ilmiy tadqiqotlarni, ikki mamlakat yosh olimlarining birgalikdagi ilmiy izlanishlarini moliyalashtirish, talaba va professor-o‘qituvchilar almashuvi bo‘yicha qo‘shma loyihalarni amalga oshirishga xizmat qiladi.
Shavkat Mirziyoyev O‘zbekiston—Yaponiya azaliy do‘stligining ramzi sifatida O‘zbekistonda o‘zbek va yapon tillarida chop etilgan bir qancha kitob va albomlarni Nagoya universiteti kutubxonasiga taqdim etdi.
Izoh (0)