13-dekabr kuni Oliy Majlis Senatining Fan, ta’lim va sog‘liqni saqlash masalalari qo‘mitasi majlisi bo‘lib o‘tdi, deb xabar beradi Senat axborot xizmati.
Yig‘ilishda senatorlar tomonidan Xalqaro mehnat tashkilotining ish bilan ta’minlash sohasidagi siyosat to‘g‘risidagi konvensiyasi ijro etilishi holati yuzasidan Bandlik va mehnat munosabatlari vazirligining axboroti eshitildi.
Ta’kidlanishicha, mamlakatda ushbu konvensiya ijrosi bo‘yicha qator ishlar amalga oshirilgan. Xususan, bugungi kunda respublikada 33,7 million doimiy aholining 14,9 millioni iqtisodiy faol bo‘lib, ularning 13,6 millioni ish bilan ta’minlangan.
Shu bilan birga tahlillarga ko‘ra, Bandlik va mehnat munosabatlari vazirligi tomonidan taqdim etilgan axborotda ayrim masalalar yetarli darajada yoki umuman yoritilmagan. Xususan, aholini ish bilan ta’minlashda xususiy bandlik agentliklarining faoliyati, bu borada yuzaga kelayotgan muammolar haqida ma’lumot keltirilmagan. Oliy ta’lim muassasalari va kasb-hunar kollejlarini bitirgan fuqarolarning ish bilan ta’minlanishi, mehnat bozorida talab yuqori bo‘lgan, shuningdek, talab bo‘lmagan mutaxassisliklar tahlil qilinmagan.
Yig‘ilish davomida O‘zbekiston Yevrosiyo iqtisodiy ittifoqiga qo‘shiladigan bo‘lsa, mehnat migrantlarining Rossiya hududida mehnat qilgani uchun undiriladigan patent to‘lovining bekor bo‘lish yoki bo‘lmasligi to‘g‘risidagi savolga Bandlik va mehnat munosabatlari vaziri Nozim Husanov javob qaytargan.
“O‘zbekiston Yevrosiyo iqtisodiy ittifoqiga qo‘shilgandan keyin patent to‘lovi bekor bo‘ladi. Ittifoqqa a’zo davlatlarning fuqarolari teng huquqli bo‘lib qoladi”, — deb vazirning so‘zlarini keltiradi “Kun.uz”.
Aytilganlardan kelib chiqib, majlisda qo‘mita a’zolari tomonidan bir qator taklif va tavsiyalar bildirildi. Xususan, davlat buyurtmasi bo‘yicha 104 mingta yangi ish o‘rinlarining tashkil etilishi ustidan qat’iy nazorat o‘rnatish va ularning haqqoniyligini o‘rganish lozimligi aytib o‘tildi.
Izoh (0)