APL. “Chelsi” o‘z uyida yutqazib qo‘ydi, “Lester”da esa durang (video)

Futbol bo‘yicha Angliya chempionatining 17-turi doirasida 14-dekabr, shanba kuni navbatdagi 4 ta bahs bo‘lib o‘tdi.

Frenk Lempard qo‘l ostidagi Londonning “Chelsi” klubi “Stemford Brij”da “Bornmut”ni qabul qildi.

Uchrashuvdagi yagona golga mehmon jamoa yarim himoyachisi Den Gosling (84) mualliflik qildi.

Shu tariqa “aristokratlar” o‘z uyida “Bornmut”ga kichik 0:1 hisobida mag‘lub bo‘ldi va ochko yo‘qotdi.

Ma’lumot uchun, “Chelsi” 29 ochko jamg‘argan holda musobaqa jadvalida 4-o‘rinda bormoqda. “Bornmut” esa 19 ochko bilan 14-o‘rindan joy oldi.

Shu kuni Brendan Rojers boshqaruvidagi “Lester” o‘z maydonida “Norvich” bilan bellashdi.

O‘yinning 26-daqiqasida “kanareykalar” hujumchisi Teyemu Pukki hisobni ochgan bo‘lsa, 38-daqiqaga kelib mehmon jamoa darvozaboni Tim Krul avtogol muallifiga aylandi.

Natijada bahs 1:1 hisobida yakunlandi va tomonlar bir ochkodan bo‘lishib oldi.

Qayd etish joiz, “Lester” ayni damda 39 ochko to‘plab musobaqa jadvalida 2-pog‘onani egallab turibdi. “Norvich” esa 12 ochko yig‘ib 19-o‘rinni band qilib turibdi.