Axborot va ommaviy kommunikatsiyalar agentligida Bosh prokuratura xodimlari hamda ommaviy axborot vositalari vakillari ishtirokida O‘zbekiston Prezidentining “Ozodlikdan mahrum etish jazosini o‘tayotgan, qilmishiga chin ko‘ngildan pushaymon bo‘lgan va tuzalish yo‘liga qat’iy o‘tgan bir guruh shaxslarni afv etish to‘g‘risida”gi farmoni ijrosiga bag‘ishlangan matbuot anjumani bo‘lib o‘tdi.
Jazo muddatini o‘tayotgan, qilmishiga chin ko‘ngildan pushaymon bo‘lgan va tuzalish yo‘liga o‘tgan shaxslar sud tomonidan tayinlangan jazoning uchdan ikki qismini o‘tashsa, Prezidentga afv so‘rab murojaat qilish huquqiga ega bo‘ladi.
“Mahkum jazoning uchdan ikki qismini o‘tasagina Prezidentga afv so‘rab murojaat qilish huquqiga ega bo‘ladi. Prezidentning 2018-yil 8-maydagi farmoni bilan tasdiqlangan ‘O‘zbekiston Respublikasida afv etishni amalga oshirish tartibi to‘g‘risida’gi nizomda bu qoida kiritilgan. Jazoning uchdan ikki qismini o‘tab bo‘lib, keyin jazoni o‘tash muassasasi ma’muriyati orqali ariza bilan Prezident huzuridagi Afv etish masalalari bo‘yicha komissiyaga murojaat qiladi”, — deydi bosh prokuror o‘rinbosari Svetlana Ortiqova.
Matbuot anjumani davomida ommaviy axborot vositalariga qayd etilgan farmon ijrosining borishi xususida axborot berildi.
Jumladan, farmonga asosan jazoni ijro etish muassasalarida jazo muddatini o‘tayotgan 575 nafar shaxslar afv etilib, shundan 361 nafari jazodan ozod etildi va 214 nafarining o‘talmagan jazo muddati 1/4 qismiga qisqartirilgan.
Jazodan ozod etilgan 361 nafar shaxslarning ijtimoiy moslashuvini ta’minlash hamda ular tomonidan huquqbuzarliklar sodir etilishining oldini olish maqsadida ularning barchasi ichki ishlar idoralarining profilaktik hisobiga olindi, 257 nafariga biometrik pasportlar berildi, 1 nafar chet el fuqarosi va 1 nafar fuqaroligi bo‘lmagan shaxsga O‘zbekistonda doimiy yashash guvohnomasi rasmiylashtirildi.
Sog‘liqni saqlash organlari bilan hamkorlikda afv etilganlarning 361 nafari tibbiy ko‘rikdan o‘tkazildi. Tibbiy ko‘rik xulosasi asosida ularning 24 nafari davolanishi tashkil etildi, 6 nafariga nafaqa tayinlandi.
Shuningdek, afv etilgan shaxslarga mahalliy hokimliklar tomonidan 419,8 million so‘m miqdorida moddiy yordam ko‘rsatildi, mehnatga layoqatli bo‘lgan 326 nafaridan 315 nafari ishga, 10 nafari o‘qishga joylashtirildi.
Ozod etilgan shaxslarning ijtimoiy moslashuvida yordam ko‘rsatish maqsadida ularning yashash, o‘qish va ish joylarida 1253 nafar murabbiylar biriktirildi.