Amerikaning Washington Post nashri AQShning Afg‘oniston hududidagi harbiy operatsiyalari haqida maxfiy ma’lumotlarni oshkor qildi. Bu haqda “Afghanistan.ru” xabar berdi.
Oshkor etilgan ma’lumotlarda 400 nafardan ortiq harbiylar, diplomatlar va amaldorlar bilan intervyular mavjud. Hujjatlarga ko‘ra, rasmiy shaxslar yolg‘on bayonot bergan va statistikani qalbakilashtirgan hamda harbiy nizo haqida jamoatchilikka noto‘g‘ri axborot yetkazgan.
Nashrning qayd etishicha, intervyular Afg‘oniston tiklanishi maxsus bosh inspektori Jon Sopko ofisi tomonidan o‘tkazilgan.
Shuningdek, Washington Post gazetasi kichik Jorj Bush administratsiyasida mudofaa vaziri lavozimida ishlagan Donald Ramsfeldning qaydnomalarini ham e’lon qilgan.
Hujjatlarda avvaliga AQShning Afg‘onistondagi urush yuzasidan aniq strategiyaga ega bo‘lmagani qayd qilingan. Intervyu bergan o‘nlab odamlar amerikaliklarning tashabbuslari Afg‘oniston islom respublikasida amalga oshmagani va bunda AQSh mamlakat xususida yetarli ma’lumotga ega bo‘lmaganligi pand berganini ta’kidlagan.
“Afg‘onistondagi yomon odamlar kim ekanini yaxshi tushunmayman”, — deb yozgan sobiq mudofaa vaziri Ramsfeld.
So‘rovda qatnashgan boshqa harbiylar esa nima maqsadda Afg‘oniston hududida urush olib borayotganini tushunmasligi haqida gapirgan.
E’lon qilingan intervyularda AQSh hukumatining Afg‘onistondagi vaziyatni o‘nglash uchun keragidan ortiq mablag‘ sarflab yuborgani, biroq korrupsiyaga ko‘z yumgani bildirilgan.
“Ushbu mablag‘larni o‘ta yopiq mamlakat va jamiyatga sarflay olmaysiz. Oqibatda korrupsiya holatlari avjiga chiqadi”, — deya ta’kidlagan AQShning Afg‘onistondagi sobiq elchisi Rayan Kroker.
Afg‘oniston tiklanishi maxsus bosh inspektori Jon Sopko hujjatlarda hukumatning Amerika xalqini Afg‘oniston bo‘yicha siyosat haqida yolg‘onlar bilan aldaganini aytgan.
Afg‘oniston matbuoti Washington Post nashr etgan materiallarga munosabat bildirmagan.
Qatarda Vashington hamda Afg‘onistondagi “Tolibon” harakati vakillari o‘rtasida mamlakatda tinchlik o‘rnatish yuzasidan muzokaralar o‘tkazilmoqda. Tomonlar o‘rtasidagi muzokaralar yopiq eshiklar ichkarisida bo‘lib o‘tmoqda, lekin “Tolibon” harakati vakili Suxayl Shahin bu borada o‘zaro murosa qilish imkoniyati paydo bo‘lganiga sha’ma qilgan. Uning so‘zlariga ko‘ra, kelishuv Doha shahrida 23 nafar tashqi ishlar vazirlari va xalqaro tashkilotlar vakillari ishtirokida imzolanishi mumkin.
Izoh (0)