Toshkent viloyati “Chinor” YPX maskanida katta miqdordagi pirotexnika mahsulotlarini ushlandi. Bu haqda Toshkent viloyati IIBB YHXB axborot xizmati “Daryo” ga xabar berdi.

Foto: Toshkent viloyati IIBB YHXB axborot xizmati

Toshkent viloyati IIBB Yo‘l harakati xavfsizligi boshqarmasi va patrul-post xizmati xodimlari tomonidan, joriy yil 6-dekabr kuni Ohangaron tumanida joylashgan yo‘l harakati xavfsizligi boshqarmasiga qarashli “Chinor” YPX maskanida o‘tkazilgan tezkor tadbir natijasida O‘zbekiston Respublikasida taqiqlangan, jami 12 ming 50 quti yoki 732 ming dona noqonuniy pirotexnika vositalari va turli hajmdagi 556 dona salyutlar aniqlanib ushlandi. Ularning taxminiy bahosi 100 million so‘mga teng.

Foto: Toshkent viloyati IIBB YHXB axborot xizmati

Xususan, “O‘sh-Toshkent” yo‘nalishi bo‘ylab harakatlanib kelayotgan Hyundai rusumli yuk avtomashinasining yukxonasida hech qanday hujjatlarsiz jami 5 ming quti yoki 300 ming dona “Mikki Maus” nomli taxminiy bahosi 40 million so‘mlik pirotexnika vositasi hamda 21 dona televizor, 5 litrli 20 dona polietilen idishlarda suyuqlik moddasi, 3 dona polietilen qoplarda noma’lum kukunlar borligi aniqlangan.

Foto: Toshkent viloyati IIBB YHXB axborot xizmati

Foto: Toshkent viloyati IIBB YHXB axborot xizmati

Shu kuni maskan orqali o‘tayotgan Toshkent shahar Olmazor tumanida yashovchi 1983-yilda tug‘ilgan M.Shukurov boshqaruvidagi Cobalt rusumli avtomashinaning yukxonasida ham Toshkent shahri Shayxontohur tumanida yashovchi 1985-yilda tug‘ilgan D.Xasanovga tegishli bo‘lgan jami 144 blok turli hajmdagi salyutlar hamda jami 48 blok “Britanik” nomli taxminiy bahosi 13 million 948 ming so‘m bo‘lgan pirotexnika vositalari borligi aniqlangan.

Yuqorida keltirib o‘tilgan holatlar yuzasidan IIBB tomonidan qo‘shimcha surishtiruv harakatlari olib borilmoqda.