“Sof.uz” fotosuratchi Sergey Mixaylovich Prokudin-Gorskiyning bir asr avval O‘zbekiston hamda qisman Turkmaniston va Qirg‘izistonning yuz yil avvalgi holatini ko‘rsatuvchi suratlari jamlanmasini taqdim etdi.
Suratlarning mavzusi xilma-xil – Buxoroning mashhur va so‘nggi amiri Sayid Olimxondan tortib uning zindonida yotgan zanjirlangan mahbuslargacha, dashtdagi ko‘chmanchilardan shahardagi savdogar-u tilanchilargacha tasvirlangan.
1863-yil Rossiyaning Vladimir guberniyasida tug‘ilgan Sergey Mixaylovich Prokudin-Gorskiy fotosuratchi, kimyogar, kashfiyotchi va noshir edi. U dunyoda birinchilardan bo‘lib rangli surat olishni yo‘lga qo‘ygan. 1917-yil inqilobidan keyin Fransiyaga muhojirlikka ketgan va 1944-yil o‘sha yerda vafot etgan Prokudin-Gorskiyning arxivida 4 000 dan oshiq turli mavzulardagi suratlar bo‘lgan. Afsuski, bugungi kungacha bu suratlardan 2 000 ga yaqinigina yetib kelgan va hozirda AQSh Kongress kutubxonasida saqlanadi.
Prokudin-Gorskiyning asosiy fotosuratlari Rossiyadagi o‘sha davr hayotini aks ettirgan. Shu bilan birga u 1904—1916-yillar davomida Rossiya imperiyasi tarkibiga kiruvchi hozirgi Ukraina, Belarus, Gruziya, O‘zbekiston, Tojikiston, Qirg‘iziston, Ozarbayjon, Latviya, Finlandiyada, shuningdek, imperiya chegaralaridan tashqaridagi Fransiya, Turkiya, Shveysariya, Germaniya, Daniya, Italiya va Avstriya kabi mamlakatlarda bo‘lib, u yerlarda o‘zi muhim sanagan shaxslar, joylar suratlarini tarixga muhrlagan.
Prokudin-Gorskiy olgan fotolar Chor Rossiyasi podshosi Nikolay II qo‘l ostidagi yerlar haqidagi loyihaning bir qismi bo‘lgan. Prokudin-Gorskiy Rossiya podshosiga tegishli bepoyon hududlarning rangli panoramasini tuzishni istagan.
Izoh (0)