Qonunchilik palatasining 2019-yil 26-noyabrda o‘tkazilgan majlisida yangi tahrirdagi Soliq kodeksi to‘g‘risidagi qonun loyihasi konseptual jihatdan birinchi o‘qishda ma’qullangan edi.
Foto: Soliq qo‘mitasi matbuot xizmati
Parlament matbuot xizmatining xabar berishicha, ayni paytda parlament quyi palatasining barcha qo‘mitalari, siyosiy partiyalar fraksiyalari va O‘zbekiston Ekologik harakati deputatlar guruhi yig‘ilishlarida hamda ishchi guruhlarda mazkur qonun loyihasi keng muhokamada moddama-modda ko‘rib chiqilmoqda.
Kodeks loyihasida asosiy e’tibor soliq qonunchiligini maksimal darajada soddalashtirishga, ziddiyatlar va tushunmovchiliklarni bartaraf etishga, insofli soliq to‘lovchilar manfaatlarini himoya qilishga qaratilgan bo‘lsa, soliq organlarining huquq va majburiyatlari belgilangan holda ularning javobgarligi ham kuchaytirilmoqda, deyiladi parlament xabarida.
Muhim o‘zgarishlardan biri bu ortiqcha to‘langan soliq summalarining o‘z vaqtida qaytarilmagani yoki soliq summalari so‘zsiz tartibda asossiz undirilgani uchun O‘zbekiston Respublikasi Markaziy bankining qayta moliyalashtirish stavkasi miqdorida budjetdan soliq to‘lovchilarga foiz to‘lash yo‘li bilan soliq organlarining javobgarligini kuchaytirishdir.
Qayd etilishicha, kodeks loyihasida asosiy vositalar obyektlari, shu jumladan, ko‘chmas mulk obyektlari xarid qilinganda (barpo etilganda) qo‘shimcha qiymat solig‘i (QQS) biryo‘la hisobga olinishini nazarda tutuvchi tartib joriy etilishi bilan soliqni to‘lash tartiblari ham soddalashtirilmoqda. Shuningdek, qo‘shilgan qiymat solig‘ini qaytarib berish tizimi tubdan o‘zgartirildi. Ya’ni, batafsil kameral tekshiruv o‘tkazilganidan keyin QQS bo‘yicha “manfiy” qoldiq summasini qaytarish huquqi taqdim etiladi.
Avvalroq Soliq kodeksining yangi tahririda tadbirkorlarga soliqlarni to‘lashni kechiktirish yoki bo‘lib to‘lash imkoni berilayotgani haqida xabar berilgan edi.
