Malayziyadagi bank xodimasi Xiza Ezani 10 ringgit qiymatdagi noodatiy kupyuraga duch keldi, deb yozmoqda Meduza.

Foto: Facebook / Hyza Ezany

Qayd etilishicha, banknotaga yozilgan gaplar uning e’tiborini tortgan. Unda “Bu 2010-yil 21-may kuni ertalab 7:10 da otam bergan so‘nggi pul. Men sizni yaxshi ko‘raman, dada”, deb yozilgan bo‘lgan.

Ezani qanday bo‘lsa ham esdalik pulni haqiqiy egasiga qaytirishga qaror qilgan. Bank xodimasi kupyura suratini ijtimoiy tarmoqqa joylab, ma’lumot egasiga tezroq yetishi uchun uni tarqatishni so‘ragan.

Uning joylagan posti foydalanuvchilar tomonidan 24 mingdan ortiq ulashilgan. Oradan bir hafta o‘tgach, kupyuraning egasi ham topilib, u Enn Malar Yesudas ismli ayol ekanligi aniqlangan. Ma’lum bo‘lishicha, 2010-yilda u 17 yoshligida otasi 21-may kuni ertalab uni maktabga kuzatgan va kundalik xarajatlari uchun 10 Malayziya riggiti bergan. Bu Yesudasning otasini so‘nggi bor ko‘rishi edi. Shu kuni u baxtsiz hodisaga uchrab, vafot etgan.

Shundan buyon 2018-yilning sentabrida o‘g‘rilar tunab ketgunigacha Yesudas esdalik kupyurani hamyonida saqlagan. Uning aytishicha, o‘g‘irlangan hamyoniga sira achinmagan, faqat unga ahamiyatli bo‘lgan esdalik kupyura uchun kuyungan.

Yesudas o‘sha 10 ringgit kupyuraning egasi qidirilayotgani yozilgan Ezanining postini ko‘rib xursand bo‘lib ketgan. U bank xodimasi bilan bog‘lanib, kupyurasini olib ketgan va Facebook’da minnatdorchilik postini yozib qoldirgan.