IIV O‘zbekistonda Prezident buyrug‘i bilan olib tashlangan postlar faoliyati qayta tiklanganiga izoh berdi

So‘nggi vaqtlarda ijtimoiy tarmoqlarda viloyatlarning chegara hududlarida qayta tiklanayotgan postlar haqida ma’lumotlar tarqatilib, nima sababdan bunday ishlar amalga oshirilayotganligi to‘g‘risida savollar ko‘payib bormoqda.

Jumladan, “Farg‘ona—Vodil”, “Farg‘ona—Avval” yo‘llarida 2018-yil boshida tugatilgan nazorat postlari qayta tiklangan. Bloger Sherali Soliyevning mushtariylari Quvasoy shahriga kirishdagi “Pakana” posti, Qo‘chqorchiga kirishdagi post, “Quvasoy—Arsif” yo‘nalishidagi “Behizor” postlari qayta tiklanganini ma’lum qilgan.

Blogerning mushtariylari, shuningdek, Toshkent viloyati Qibray tumanidagi Agrar universitet bilan Salor qo‘rg‘oni oralig‘idagi post qayta tiklangani haqida ham yozgan. Bundan tashqari, Buxoro viloyatining G‘ijduvon tumanidagi “Sarmijon” va “Eshonko‘prik” postlari faoliyati 2018-yil boshida to‘xtatilgach, ko‘p o‘tmay yana qayta tiklangani ta’kidlangan.

Ichki ishlar vazirining matbuot kotibi Shohrux G‘iyosovning “Daryo”ga ma’lum qilishicha, Vazirlar Mahkamasining 2018-yil 19-maydagi “O‘zbekiston Respublikasi yo‘l xavfsizligini ta’minlash tizimini yanada takomillashtirish chora-tadbirlari to‘g‘risida”gi qaroriga muvofiq respublika hududida mavjud bo‘lgan 133 ta yo‘l-patrul xizmati statsionar postlari va patrul-post xizmati postlaridan 74 tasining faoliyati tugatilib, bugungi kunda ulardan 59 tasi o‘z ishini davom ettirmoqda.

Shu bilan bir qatorda, yuzaga kelgan tezkor va kriminogen vaziyatni inobatga olgan holda o‘rnatilgan tartibda IIV rahbariyati bilan kelishgan holda Qoraqalpog‘iston Ichki ishlar vaziri, Toshkent shahar va Toshkent viloyati IIBlari va viloyatlar IIB boshliqlari tomonidan yo‘l-patrul va patrul-post xizmati postlarini vaqtincha tashkil etish va tugatish tartibi mavjud.

O‘zbekistonda rejalashtirilayotgan nufuzli siyosiy va bayram tadbirlariga tayyorgarlik ko‘rish va o‘tkazish jarayonida xavfsizlikni ta’minlashni samarali tashkil etish maqsadida ayrim hududlarda vaqtinchalik yo‘l-patrul va patrul-post xizmati postlari tashkil etilmoqda.

“Fuqarolardan ushbu xavfsizlik nuqtayi nazaridan amalga oshirilayotgan muhim vazifalarni to‘g‘ri qabul qilishlarini hamda ijtimoiy tarmoqlarda turli nomaqbul fikrlarni tarqatmasliklarini so‘rab qolamiz”, — deydi IIV matbuot kotibi.

Eslatib o‘tamiz, viloyatlar chegaralaridagi nazorat postlari Prezident Shavkat Mirziyoyevning Oliy Majlisga 2017-yilgi murojaatnomasidan so‘ng olib tashlangan edi. Prezident bunday postlarning “eskicha joylashuvi harakatlanish erkinligini cheklab, savdo-iqtisodiy munosabatlar, ichki va tashqi turizm rivojiga salbiy ta’sir ko‘rsatayotgani”ni ta’kidlagan edi.

“O‘zingiz o‘ylang, bugungi kunda mamlakatimiz hududida 60 dan ziyod bunday post mavjud. Endi tasavvur qiling, oddiy odam Xorazmdan Toshkentga mashinasida bormoqchi bo‘lsa, yo‘lda 17 ta postdan o‘tadi. Farg‘ona vodiysidan kelayotgan kishi esa 8 ta ana shunday postga duch keladi”, — degan edi davlat rahbari.