“Daryo” internet nashrida “Qashqadaryoda hokimlik elektr energiyasidan noqonuniy foydalanib, davlatga 55,8 mln so‘m zarar yetkazdi” sarlavhali xabar e’lon qilingandi. Mazkur maqolaga G‘uzor tuman hokimligi munosabat bildirib, elektr energiyasidan qarzdorlik hokimlik zimmasida emas, hokimlikka qarashli binoda faoliyat ko‘rsatayotgan tashkilotlar bo‘ynida ekanligini ta’kidlamoqda.

G‘uzor tuman hokimligi ma’muriy binosi tumanning Mustaqillik ko‘chasi 14-uyda joylashgan bo‘lib, binoda tuman Elektr  tarmoqlari  korxonasi tomonidan zamonaviy DTS-541 (SE-303 energomer) elektr hisoblagich uskunasi o‘rnatilgan. Hokimlik tomonidan joriy yilning o‘tgan davri mobaynida elektr energiyasi uchun jami 16 mln so‘m mablag‘ to‘lab berilgan bo‘lib, bugungi kunda iste’mol qilingan elektr energiyasi uchun qarzdorlik mavjud emasligi aniqlandi.

Ta’kidlash kerakki, xabarda nazarda tutilgan ma’muriy bino tumandagi “O‘zbekiston” ko‘chasi 68-uyda joylashgan.

Mazkur 2 qavatli bino tuman hokimligiga qarashli bo‘lsa-da, unda tuman Moliya bo‘limi va jami 5 ta idora va tashkilotlar faoliyat ko‘rsatib kelmoqda. Mazkur binoda DTS-541 rusumli zavod raqami №543724 raqamli elektr hisoblagich uskunasi o‘rnatilgan va tuman Elektr ta’minoti korxonasi tomonidan tegishli tartibda ro‘yxatdan o‘tkazilgan.

O‘tkazilgan xatlovda elektr hisoblagich uskunasida to‘lanmasdan qolgan 124.214 kVt/soat, ya’ni 55,8 mln so‘m qarzdorlik mavjudligi aniqlangan.

Bugungi kunda mazkur bino elektr ta’minoti tarmog‘idan to‘liq uzilgan va iste’mol qilingan qarzdorlikni qisqa muddatda bartaraf etish choralari belgilab olindi.

Shuni ham qayd etish kerakki, “O‘zenergoinspektsiya” korxonasi hududiy bo‘limi tomonidan 2019-yil 1-noyabrda rasmiylashtirilgan bayonnomada tarmoqqa ulanish qonunda belgilangan tartibda amalga oshirilganligi, biroq iste’mol qilingan mazkur qarzdorlik PK “Elektrhisob” dasturiga kiritilmasdan qolganligi nazarda tutilganligini ma’lum qilamiz.

G‘uzor tuman hokimligi axborot xizmati