Messenjerlardagi “Rahmat”, “Ok” kabi keraksiz xabarlar ekologiyaga zarar yetkazishi ma’lum qilindi

Messenjerlar orqali jo‘natiladigan keraksiz va ma’noga ega bo‘lmagan xabarlar atrof-muhitga zarar yetkazishi aniqlandi. OVO Energy kompaniyasi tomonidan amalga oshirilgan tadqiqot natijasida mazkur xavf haqida ma’lum qilingan.

So‘rov natijalariga ko‘ra, Buyuk Britaniya aholisining 72 foizi ularning ijtimoiy tarmoqlar va messenjerlardagi yozishmalari uglerod oksidi gazlari ishlab chiqarilishiga sabab bo‘lishini bilmaydi. Uglerod gazlari ma’lum bir mahsulotni ishlab chiqarishda yuzaga keladigan zararli gazlar to‘plami bo‘lib, xabarlar jo‘natish jarayonida ularni yetkazib beruvchi serverlar ishlaydi va ular uglerod oksidi gazlarini ishlab chiqaradi.

Kompaniyaning hisob-kitoblariga ko‘ra, britaniyaliklar har yili “Rahmat”, “Oldim” “Ok” yoki “Lol” kabi 64 millionta keraksiz va mazmunsiz xabar jo‘natadi.

Buning uchun taxminan 23 475 tonna uglerod ketadi. Tashkilotning ma’lum qilishicha, agar Buyuk Britaniyaning har bir voyaga yetgan kishisi kuniga bittadan keraksiz xabar jo‘natishdan tiyilsa, zararli gazlar miqdori yiliga 16 433 tonnaga kamayadi. Taxminan shu miqdordagi uglerod oksidi gazlari Londondan Madridga uchadigan 81 152 ta reys yoki 3 334 ta ichki yonuv dvigatelli avtomobil tomonidan ishlab chiqariladi.