O‘zbekiston Bosh vaziri Abdulla Aripov rahbarligida 28-noyabr kuni aholi va ijtimoiy soha obyektlarini energoresurslar — gaz va elektr energiya bilan ta’minlashdagi muammolarga bag‘ishlangan videoselektor yig‘ilishi bo‘lib o‘tdi, deb yozadi “Xabar.uz”.
Tanqidiy-tahliliy ruhda o‘tgan yig‘ilishda bosh vazir sovuq tushishi bilan iste’molchilarning elektr energiyasi va gazga bo‘lgan talabi keskin oshishini aytib, hali qish kirmasdan turib, energoresurslar ta’minotida o‘ta jiddiy muammolar paydo bo‘lgani, hatto metro va televideniyeda elektr energiyasi bilan yuz bergan noxush holatlarni keskin tanqid qilgan.
Bu sharmandali holat. Ommaviy axborot vositalari, internet-nashrlar va ijtimoiy tarmoqlarda bu haqda aholining haqli e’tirozlari keng yoritilmoqda. Gaz va elektr energiya yetkazib beruvchilar o‘z ishlariga mas’uliyat bilan qarashmayapti. Mutasaddi rahbarlar shuncha salbiy holatlarga biron marta ommaviy axborot vositalari orqali tushuntirish yoki asosli javob bergani yo‘q.Bosh vazir, shuningdek, belgilangan reja asosida gaz iste’molchilarga yetib bormaganini qoraladi. Energoresurslar tejamkorligiga e’tibor berilmayotgani, tushuntirish ishlari samarali bo‘lmayotganini tanqid qildi.Misol uchun, 27-noyabr kuni sutka davomida 110 kilovolt kuchlanishli 144 ta liniyada jami 300 martadan ortiq cheklov amalga oshirilgan. Ushbu liniyalarda 1,5 soatdan 5 soatgacha cheklov kiritilishi qanchalik adolatga to‘g‘ri keladi? Bu kabi holatlar natijasida aholi tomonidan nafaqat Energetika vazirligiga nisbatan, balki butun hukumatga nisbatan e’tiroz paydo bo‘lmoqda.
31 413 ta holatda elektr energiyadan noqonuniy foydalanish holati aniqlangan, zarar miqdori esa 22 milliard so‘mni tashkil qiladi. Gaz tarmoqlariga o‘zboshimchalik bilan ulanish holatlari judayam ko‘p. Natijada jabrini aholi ko‘ryapti.
Abdulla Aripov, O‘zbekiston Bosh vaziri
Avvalroq, elektr ta’minotidagi uzilishlar TVdagi jonli efir va metroni to‘xtatib qo‘ygani haqida xabar berilgan edi.Xalqaro press-klubning 27-noyabr kuni Markaziy saylov komissiyasining Toshkent shahar Shayxontohur tumanida joylashgan Xalqaro matbuot markazida tashkil etilgan navbatdagi jonli efir orqali efirga uzatilayotgan press-konferensiyasi vaqtida elektr ta’minotida uzilish yuz berib, tadbir ishtirokchilari taxminan 5—7 daqiqa davomida chiroqsiz qolib ketgan.
Shuningdek, 27-noyabr kuni soat 10:42 da 3 ta bekatda — “G‘afur G‘ulom”, “Alisher Navoiy”, “O‘zbekiston” stansiyalarida chiroqlar miltillab yongan. Bir daqiqa o‘tgach, soat 10:43 da elektr uzatilishi to‘liq tiklangan.
Mavzuga doir:
Izoh (0)