Rossiyaning Orenburg viloyati Sol—Iletsk tuman sudi tomonidan 32 yoshli O‘zbekiston fuqarosiga nisbatan ochilgan jinoyat ishi bo‘yicha hukm chiqarildi. Bu haqda Orenburg viloyati prokuraturasi xabar berdi.
O‘zbekiston fuqarosiga nisbatan Rossiya Federatsiyasi Jinoyat kodeksining 322,1 (xorijiy fuqarolarning Rossiya Federatsiyasiga noqonuniy kirishi va ularning noqonuniy qolishini tashkil etish) moddasi bilan jinoyat ishi qo‘zg‘atilgan.
Sud O‘zbekiston fuqarosining joriy yilning oktabr oyida 2400 AQSh dollari evaziga uch nafar hamyurtiga “Andijon-Moskva” yo‘nalishidagi poyezdda Rossiyaga kirishini tashkil etganini aniqladi.
Qayd etilishicha, poyezd xodimi migrantlarni platskard vagonlarning birida tom ostidagi bo‘lmaga yashirgan.
Ular Orenburg viloyatidagi bojxona nazorati postida poyezdning tomi ostidagi bo‘lmasida yashirinib olgan vaqtlarida qo‘lga olingan.
Rossiya chegarachilari tomonidan poyezd mutasaddisi ham qo‘lga olinib, unga nisbatan ish ochilgan va 6 oylik qamoq jazosi tayinlangan.
Qayd etilishicha, ushbu o‘zbekistonlik migrantlarga Rossiyaga kirish uchun taqiq o‘rnatilgan, shu sababli noqonuniy yo‘l bilan bo‘lsa-da, ish qidirib chet elga ketishga majbur bo‘lgan.
Izoh (0)