Qashqadaryoda er-xotin haydovchiga o‘ldirish bilan tahdid qilib, avtomobilini o‘g‘irladi (video)

Qashqadaryoda er-xotin avtomobil o‘g‘irlashi bilan bog‘liq holat qayd etildi. Bu haqda “Zamon” axborot dasturi xabar bermoqda.

Qayd etilishicha, er avval ham bu turdagi jinoyatga qo‘l urgani uchun sudlangan, keyinchalik esa shar’iy nikohida bo‘lgan turmush o‘rtog‘ini ham qing‘ir ishlarga jalb etgan.

—Joriy yil 1-oktabr kuni soat 17:30 atrofida 2000-yilda tug‘ilgan, muqaddam sudlangan fuqaro 1996-yilda tug‘ilgan, shar’iy nikohida bo‘lgan turmush o‘rtog‘i bilan til biriktirib, “Muborak” dehqon bozori yaqinidagi avtoturargohdan tumanning O‘tror qishlog‘iga borib kelish uchun mashina yollagan. VAZ 2107 haydovchisiga buning uchun 90 ming so‘m va’da qilingan. Yo‘lda ketayotganda ayol tobi qochayotganini aytib, mashinani to‘xtatishni so‘raydi. Uning ortidan tushgan er xotinini topa olmayotganini bahona qilib, haydovchini ham avtomobildan tushirishga muvaffaq bo‘ladi. So‘ng uning boshiga yonida bo‘lgan armatura bilan bir necha bor urib, oyoq-qo‘lini bog‘lab, o‘ldirish bilan tahdid qilib, tashlab ketadi. Er-xotin o‘g‘irlangan mashinada voqea joyidan yashirinadi, — deya hikoya qiladi IIV huzuridagi Tergov departamenti mas’ul xodimi Adham Abdullayev.

Mazkur holat yuzasidan 2-oktabr kuni JKning 267-moddasi, 3-qismi “v” bandi bilan jinoyat ishi qo‘zg‘atildi va ikki shaxsga nisbatan ham ayblov e’lon qilindi. Muqaddam sudlangan er ehtiyot chorasi sifatida qamoqqa olindi, uning shar’iy nikohdagi xotiniga esa ozodlikdan mahrum etish bilan bog‘liq bo‘lmagan chora qo‘llandi. Hozirda tergov harakatlari davom etmoqda.