Afg‘onistonning yana 147 nafar fuqarosi ta’lim olish uchun O‘zbekistonga keldi

O‘zbekistonda oliy ma’lumot olish va malakali mutaxassis bo‘lish istagida tashrif buyurgan 147 nafar afg‘onistonlik yoshlardan iborat delegatsiya 25-noyabr, dushanba kuni “Hayraton” chegara postida tantanali kutib olindi. Bu haqda Oliy va o‘rta-maxsus ta’lim vazirligi xabar berdi.

Afg‘oniston fuqarolari Prezident Shavkat Mirziyoyev tashabbusi bilan tashkil etilgan Oliy va o‘rta maxsus ta’lim vazirligi huzuridagi afg‘on fuqarolarini o‘qitishga mo‘ljallangan ta’lim markazida tahsil oladi.

Afg‘onistonlik yoshlardan 119 nafari o‘zbek tili va adabiyoti, 18 nafari akusherlik va hamshira ishi hamda 10 nafari yerusti transport tizimlari va ekspluatatsiya, lokomotiv va vagonlar ishi ta’lim yo‘nalishlarida o‘qiydi.

Talabalarga mashg‘ulotlar olib borish uchun Alisher Navoiy nomidagi Toshkent davlat o‘zbek tili va adabiyoti universiteti, Toshkent temir yo‘l muhandislari instituti hamda Toshkent tibbiyot akademiyasidan professor-o‘qituvchilar jalb etilgan.

Mehmonlarni kutib olish marosimida O‘zbekistonning Afg‘oniston bo‘yicha maxsus vakili Ismatulla Ergashev, Oliy va o‘rta maxsus ta’lim vaziri o‘rinbosari Sarvar Buzrukxonov, Afg‘onistonning Termiz shahridagi konsuli S.Sakandariy, Afg‘oniston oliy ta’lim vazirining o‘rinbosari A.Hoshimiy, viloyat hokimligi rahbarlari va boshqalar ishtirok etdi.