Bugun,

  • USD 11014.01
  • RUB 191.8
  • EUR 10674.78

Futbol bo‘yicha Yevropaning eng nufuzli musobaqasi bo‘lmish Chempionlar Ligasi guruh bosqichi bahslari ham yakuniga yetish arafasida. 26-noyabr, seshanba oqshomida 5-turning markaziy bahslaridan bir Madridda bo‘lib o‘tadi. Millionlab muxlislarninig nigohi Ispaniya poytaxtidagi bahsga qaratilgan: “Real” arab shayxlari otaliqidagi PSJga qarshi.

Foto: AS

Foto: AS

Guruh bosqichiga qur’a tashlangan vaqtda “A” guruhining so‘zsiz favoritlari sifatida “Real” va PSJ qayd etilgandi. Biroq birinchi tur o‘tiboq asosiy favorit PSJ ekanligi oydinlashib qoldi. Boisi PSJ o‘z maydonida asosiy futbolchilarsiz (Kavani, Mbappe va Neymarsiz) “Real” ortiqcha qiyinchiliklarsiz mag‘lub etishning uddasidan chiqdi — 3:0. Ikkinchi turda ham PSJning yaqqol favorit ekanligi yanada aniq bo‘ldi. Madrid klubi o‘z maydonida “Bryugge”ni mag‘lub eta olmadi. PSJ esa safarda “Galatasaroy” mag‘lub etdi.

5-turga kelib guruhdagi holat shunday: PSJ to‘rtta o‘yinning barchasida g‘alaba qozondi. To‘plar nisbati esa shunchaki ajoyib — 10:0. “Real” esa dastlabki ikki turdagi yo‘qotishlardan so‘ng “Galatasaroy”ni safar va uyda ham mag‘lub etdi. Ochkolari sonini esa yettitaga yetkazib oldi.

Bugungi bahs favoriti haqida

Yuqorida PSJning favorit ekanligini tilga oldik. Shu yerda qayerda favorit ekanligiga aniqlik kiritib o‘tsak. Parijliklar “A” guruhida favorit. Hozircha undan ortig‘i emas. Nega dersiz? PSJ so‘nggi yillarda guruh bosqichdan hech qanday qiyinchiliklarsiz o‘tmoqda. Ammo pley-off bosqichi haqida bunday deb bo‘lmaydi. Tomas Tuxel jamoasi Fransiya chempionatida ham peshqadam, biroq Chempionlar Ligasidan farqli o‘laroq ichki birinchilikda uchta o‘yinda mag‘lubiyat alamini totib ko‘rishga ulgurdi.

“Real” bo‘lsa, PSJdan uchralgan mag‘lubiyatdan so‘ng sekin-sekin bo‘lsa-da o‘ziga kelib oldi. “Galatasaroy”ga oltita gol urildi. Ispaniya chempionatida esa “Barselona” bilan birga peshqadamlikni davom ettirmoqda. O‘yin Madridda o‘tishi va “Real” futbolchilarining so‘nggi o‘yinlarda yaxshi sport formasiga kirib olgani hisobga olinsa, bugun Parijdagi kabi PSJ osonlik bilan g‘alaba qozona olmasligi aniq.

Shulardan va boshqa tilga olinmagan omillardan kelib chiqilsa, imkoniyatlar 50=50.

Tarkiblar haqida

Foto: Google Images

Foto: Google Images

Tarkib haqida gapiradigan bo‘lsak, Neymar jarohatini da’volash bilan band bo‘lgan vaqtda PSJ joniga argentinaliklar oro kirdi. Anxel di Mariya va Mauro Ikardi shunchalik qoyilmaqom o‘yin ko‘rsatmoqdaki, xuddi Neymar jamoaga ortiqchadek. Biroq Neymardek futbolchi har qanday jamoa uchun foyda keltira oladi. Balki bugun shunday bo‘lar. Ammo Ikardining ishonchli o‘yini Edinson Kavanidek to‘purarni zaxiraga mixlagani ham haqiqat. Kamiga birinchi turda ishtirok etmagan 20 yoshli vunderkind — Kilian Mbappe ham bu safargi bahsga tayyor. Har holda Zidan Mbappening “o‘yinini sevishi” haqida gapirib turgan vaqtda Kilian bunday imkoniyatni qo‘ldan boy bermasa kerak. Parijliklarning darvoza chizig‘idan ko‘ngli butkul to‘q. “Real”ga kerak bo‘lmay qolgan Keylor Navas PSJning haqiqiy ustuniga aylana oldi. Bunga uning guruh bosqichidagi o‘yinlarda bitta ham gol o‘tkazmagani yaqqol dalil, albatta. Xullas, Tuxel oldida ham qiyin vazifa bor. Boisi unda tanlov imkoniyati juda keng. Qaysidir megayulduz bugungi o‘yinni zaxiradan boshlashga majbur.

Foto: “Real”

Foto: “Real”

“Real”ga kelsak, Madrid klubida ayni damda katta muammolar deyarli yo‘q. To‘g‘ri, Marko Asensio hamda Xames Rodriges jarohatini da’volatish bilan band. Garet Beylning o‘zini tutishidan muxlislar norozi. Isko hamon Zidan kutayotgan formaga kirib ulgurmadi. Ammo “Qirollik klubi”dan ularning o‘rnini bildirmayotgan o‘yinchilarning borligini ham unutmaslik lozim. Jumladan, Beylning bemalol golf o‘ynashiga imkoniyat yaratib berayotgan 18 yoshli Rodrigoni tilga olmaslik, insofsizlik bo‘ladi. Braziliyalik o‘ziga berilayotgan imkoniyatdan maksimal darajada foydalanmoqda. O‘tgan yili jamoaga olib kelingan yana bir braziliyalik vunderkind Vinisius Juniordan farqli o‘laroq Rodrigo shu qadar sovuqqonlik bilan harakat qilmoqdaki, u hatto het-trik qilishga ham ulgurdi. Yana kamiga Chempionlar Ligasida. Bir gap bilan aytganda va echki xalaqit bermasa, bo‘ladigan bola. Mavsum avvalida ne-ne umidlar ila katta mablag‘ evaziga jamoaga olib kelingan Belgiya terma jamoasi sardori Eden Azar ham sekin-asta o‘zining optimal formasiga kirib bormoqda. Buni uning “Real Sosyedad”ga qarshi bahsdagi harakatlari ham isbotlab turibdi. U raqiblarini 10 marta aldab o‘tishga muvaffaq bo‘ldi. To‘g‘ri, u gol urmadi. Biroq jamoadoshlarining bo‘sh hudud bo‘ylab hujumga o‘tishi, gol urishi uchun eng katta hissa qo‘shayotgan futbolchilardan biriga aylanib ulgurgani ham rost. Markazda “Real”ning to‘psiz foydali harakatlarini ta’minlashda urugvaylik Federiko Valverdening o‘rni beqiyos. Zidan “Real”ni ilk bor boshqaruvga olgan vaqtida Kazemiro haqiqiy topilma bo‘lgandi. Endi esa Fede. Shunday ekan markazdan ham muxlislar xavotir olmasa bo‘ladi. Vanihoyat darvoza chizig‘i haqida. Tibo Kurtua ham o‘ziga bo‘lgan ishonchni tiklashga harakat qildi va qaysidir ma’noda buning uddasidan chiqdi. Kurtua hatto Keylor Navas tomonidan o‘rnatilgan rekordni yangiladi. Navas vaqtida 517 daqiqa davomida o‘z darvozasi daxlsizligini ta’milagan bo‘lsa, Tibo buni 534 daqiqaga yetkazdi. Uning ishonchli harakatlar sabab “Real” La Ligada eng kam gol o‘tkazgan jamoalar orasida ikkinchi bo‘lib turibdi.

Taxminiy tarkiblar

“Real”: Kurtua — Karvaxal, Ramos, Varan, Marselo — Kazemiro, Valverde, Kroos — Azar, Rodrigo, Benzema

PSJ: Navas — Silva, Kimpembe, Dagba, Bernat — Markinyos, Guye, Sarabiya — Di Mariya, Ikardi, Mbappe

Murabbiylar o‘yindan oldin

Foto: Getty Images

Foto: Getty Images
PSJga qarshi bahs hammamiz uchun muhim. Beyl uchun ham, bizga ham muxlislarga ham. Yaxshi o‘yin o‘tkazishga majburmiz. PSJ yaxshi mavsum o‘tkazmoqda. Shunday ekan, o‘zimizga bo‘lgan talab hozirgacha bo‘lganlaridan yuqori bo‘ladi. Ammo bu bizga yoqmoqda.Zinedin Zidan, “Real” bosh murabbiyi

Foto: Getty Images

Foto: Getty Images
Bu bahs birinchi davradagisidan boshqacha bo‘ladi. “Santyago Bernabeu”da o‘ynash qiyin. “Real” hozir juda yaxshi formada. Ular juda ko‘p gol urib, kam gol o‘tkazib yubormoqda. Ammo bizda ham barqaror jamoa bor. Bu chaqiruvga tayyorligimiz aniq.

Tomas Tuxel, PSJ bosh murabbiyi

YChL5-tur bahsi26-noyabr, seshanba

“Real” — PSJ 01:00

Bosh hakam: Artur Diash (Portugaliya)

Izoh
Asosiy yangiliklar
Dunyo
Zaporojyeda raketa bilan urilgan ko‘p qavatli binolar, Limanda ishlayotgan sapyorlar. Urushning 225-kunidan fotoreportaj
Mahalliy
“Yaqinda besh million olgan ekansiz, shu sabab murojaatingiz rad qilindi deb yozaman” — Toshkent viloyati hokimi
Madaniyat
Davron G‘oyipovning qanday kasallikdan vafot etgani ma’lum qilindi