O‘zbekistonda ilmiy-tadqiqot muassasalari reytingini aniqlash tartibi to‘g‘risida Vazirlar Mahkamasining tegishli qarori loyihasi muhokama uchun joylashtirildi.
Unga ko‘ra ilmiy-tadqiqot muassasalari reytingini aniqlash tartibi to‘g‘risidagi nizom tasdiqlanadi. Respublikada faoliyat ko‘rsatayotgan ilmiy-tadqiqot muassasalari reytingini shakllantirishga Innovatsion rivojlanish vazirligi mas’ul etib belgilanmoqda.
Vazirlikning bu boradagi asosiy vazifalari qatoriga ilmiy-tadqiqot muassasalarining ilmiy-tadqiqot va innovatsion faoliyati darajasi, ilmiy-tadqiqot ishlari sifati, ilmiy-innovatsion faoliyat natijalarini tavsiflovchi ma’lumotlar bazasini tizimli asosda shakllantirish, jahondagi yetakchi reyting tashkilotlari bilan hamkorlik qilish, reyting natijalari asosida respublika ilmiy-tadqiqot muassasalari faoliyati to‘g‘risida tahliliy axborot tayyorlash va har yili reyting natijalarini Innovatsion rivojlanish vazirligining rasmiy veb-saytida e’lon qilish kabilar kiritilgan.
Tegishli vazirliklar va idoralarning mas’ul tarkibiy bo‘linmalari hamda ilmiy-tadqiqot muassasalari tomonidan reytingni aniqlashga doir ma’lumotlar to‘planadi, tahlil qilinadi hamda har yili 1-fevralga qadar Innovatsion rivojlanish vazirligiga taqdim etiladi.
Ilmiy-tadqiqot muassasalari reytingini aniqlash tartibi to‘g‘risidagi nizomga ko‘ra, ilmiy-tadqiqot muassasalari o‘rtasida sog‘lom raqobat muhitini shakllantirish, ularning ilmiy-innovatsion faoliyati darajasi va sifatini oshirishni rag‘batlantirish, ilmiy xodimlarning ilmiy salohiyatidan samarali foydalanish, iqtisodiyotning real sektori tarmoqlari uchun ilmiy hajmdor mahsulotlar va texnologiyalarni tayyorlashga zamin yaratish reytingni aniqlashning maqsadi hisoblanadi.