Hindistonning Panorama Studios kino kompaniyasi tomonidan O‘zbekistonda “Khuda Hafiz” nomli romantik jangari filmni suratga olinmoqda. Filmning jangari sahnalari Qoraqalpog‘istonning Ellikqal’a tumanida suratga olindi. Bu haqda “Daryo”ga “O‘zbekkino” matbuot xizmati ma’lum qildi.

Kadr: YouTube

“Khuda Hafiz”  filmiga Hindiston, AQSh, Rossiya va boshqa Yevropa davlatlaridan 150 dan ortiq aktyorlar, shuningdek, Muqimiy nomidagi o‘zbek davlat musiqali teatri aktyori Otabek Haqberdiyev jalb etilgan.

Matbuot xizmatining xabarida mamlakatimizda kinoni qo‘llab-quvvatlash uchun yaratilgan mexanizmlar bugungi kunda nafaqat yangi hamkorlar bilan ishlash, balki yurtimizga xorijiy investitsiyalarni jalb etish imkonini ham bermoqda. Masalan, birgina hind kinoijodkorlari tomonidan ushbu film uchun O‘zbekistonda sarflanadigan mablag‘ bir million dollarga teng, deyiladi.

Hind kino ijodkorlarining “Panorama Studios” studiyasi O‘zbekistonda olinadigan otishma tasvirlarini yakunladi va filmning qolgan qismini suratga olish ishlari Hindistonda davom etadi.

Eslatib o‘tamiz, film premyerasi 2020-yilda bo‘lishi rejalashtirilgan.